Walmart компанияси хўжайинларининг бойлиги бир кунда 5 миллиард долларга ортди

Walmart компанияси асосчисининг асосий меросхўрлари ҳисобланмиш Уолтон оиласининг беш нафар аъзосини бойлиги 5 миллиард долларга ортди, деб хабар берди «Forum Daily».

Бунга келгуси йилда Walmart’нинг онлайн савдоси 40 фозига ошади, дея эълон қилинган башоратдан сўнг, компания акцияси нархининг 4,5 фоизга ўсиши сабаб бўлди.

Акциялар нархининг ўсиши тўхтаганидан сўнг, Роб, Жим, Элис, Кристи ҳамда Лукас Уолтонларнинг умумий бойлиги 140 миллиард долларни ташкил этган.

10 октябрь куни, Walmart асосчисининг катта ўғли Роб Уолтоннинг бойлиги 40,5 миллиард долларни ташкил этиб, уни дунёдаги энг бой инсонлар рўйхатининг 16-поғонасига олиб чиққан. Элис Уолтоннинг бойлиги эса 39,2 миллиар долларни ташкил этиб, уни дунёдаги энг бой иккинчи аёлга айлантирган.

Шунингдек, маълум қилинишича, Walmart келгуси йилда ўзларининг озиқ-овқат маҳсулотлари дўконлари сонини кўпайтиради ва таъкидланишича, савдо ҳажми 3 фоиздан ортиқроққа кўтарилиши мумкин.

11 октябрь куни Walmart акцияларининг нархи яна 1,5 фоизга қимматлашди.