Ўзбекистон Экология ва атроф-муҳитни муҳофаза қилиш давлат қўмитаси Чиқиндилар билан боғлиқ ишларни назорат қилиш инспекцияси ҳамда Тошкент шаҳар ҳудудий инспекцияси ходимлари томонидан Шайхонтоҳур туманида тезкор тадбир ўтказилди. Бу ҳақда қўмитанинг ахборот хизматига таяниб, Uz24 маълум қилди.
Тезкор тадбир чоғида туманнинг «Чақар» маҳалла фуқаролар йиғини ҳудудида, Бешёғоч ва Ялонкор берк кўчалари ёнида, коллектор сувлари оқиб ўтувчи ариқ бўйларида аҳоли томонидан ташланган шох-шабба ва маиший чиқиндилар уюми аниқланди.
«Чақар» МФЙ га қарашли ҳудуддаги иккита ноқонуний чиқиндихона бартараф этилиб, қарийб тўққиз тонна чиқинди олиб чиқиб кетилди. Коллектор сувлари оқиб ўтувчи ариқнинг қирғоқ бўйлари чиқиндилардан тозаланди.
Шунингдек, юқорида кўрсатилган манзилда «Шайхонтоҳур-Махсустранс» корхонаси томонидан ўрнатилган якка тартибдаги контейнерлар ҳудуддаги аҳолининг норозилигига сабаб бўлаётгани маълум бўлди. Ушбу ҳолат юзасидан Бешёғоч ва Ялонкор берк кўчаларида яшовчи аҳоли ҳамда «Чақар» МФЙ фаоллари билан йиғилиш ўтказилди.
Изоҳ (0)