2016 йилда бутун дунё бўйлаб содир бўлган турли қуролли можаролар оқибатида 8 мингдан ортиқ болакай ҳалок бўлди ёки тан жароҳати олди. Бу ҳақда БМТ бош котибининг расмий вакили Стефан Дюжаррик маълум қилди, деб хабар берди «РИА Новости».
Унинг сўзларига кўра, ўтган йил давомида Афғонистонда содир бўлган можаролар оқибатида — 3512, Сурияда — 1915, Яманда — 1340 нафар бола ҳалок бўлган ёки жароҳат олган.
«Бош котиб (Антониу Гутерриш) 2016 йилда 8 мингдан ортиқ бола ҳалок бўлган ёки жароҳат олганидан даҳшат ичида қолди… У бир нечта давлатларнинг ҳукумат ва ноҳукумат ташкилотлари мақсадга эришиш йўлида БМТ билан ҳамкорликда ишлаётганидан хурсанд (болалар ўлимини қисқартириш бўйича чора-тадбирлар)», — дейди Дюжаррик.
Аввалроқ, БМТ ИШИД террорчилик ташкилотига қарши курашган Саудия Арабистони етакчилигидаги коалицияни Ямандаги можаро вақтида болаларни ўлдирган ва жароҳатлаган ташкилотлар рўйхатига қўшган эди. «Қора рўйхат»дан шунингдек, хусийлар, Яман ҳукумат кучлари, ҳукуматга ён босувчи исёнчилар, «Ал-Қоида» аъзолари жой олган.
Ямандаги ҳарбий-сиёсий можаро 2014 йилдан бери давом этиб келмоқда.
Сурияда эса қуролли можаролар 2011 йилнинг мартидан бери давом этмоқда. БМТ маълумотларига кўра, бу вақт давомида 220 мингдан ортиқ одам ҳалок бўлган.
ИШИД экстремистик гуруҳи жаҳоннинг бир қатор мамлакатлари ва халқаро ташкилотлар томонидан «террорчилик ташкилоти» деб топилган.
Изоҳ (0)