Автоутилизация қилиш Ўзбекистонда илк бор «Табиатга имкон беринг» лойиҳаси томонидан йўлга қўйилди

Экология ва атроф-муҳитни асраш бўйича Ўзбекистон Республикасининг давлат қўмитаси ҳамда «Тошрангметзавод» АЖ ҳамкорлигида «Табиатга имкон беринг» лойиҳаси юртимизда иш бошлагани ҳақида аввал хабар берилганди.

Жорий йил бошида иш бошлаган ушбу лойиҳа юридик ҳамда жисмоний шахсларнинг эски электротехникаларини утилизация қилиш билан шуғулланарди. Бунда, узоқ пайт чиқинди бўлиб қолиб кетса, ўзидаги металл ва пластмассадан зарарли моддалар ажратиб чиқарадиган эски техникаларни атроф-муҳитга зарар келтирмайдиган усулда утилизация қилиш ва бу билан табиатни асрашда ҳисса қўшиш лойиҳанинг асосий мақсади ҳисобланади.

Яқинда эса, Вазирлар Маҳкамасининг 2017 йилнинг 11 сентябридаги «Автомототранспорт воситаларини давлат даромадига ўтказиш тартибини такомиллаштириш чора-тадбирлари тўғрисида»ги 707-сонли қарори қабул қилинганлиги боис, «Toshrangmetzavod Recycling» МЧЖ хизматлари доирасини кенгайтирди ва «Табиатга имкон беринг» лойиҳаси номи остида фойдаланишга яроқсиз автомототранспортларни ҳам утилизация қилишни бошлади.Ҳозиргача, «Табиатга имкон беринг» лойиҳасининг автоутилизация йўналиши бўйича бир қанча ташкилотлар аллақачон иштирок этиб бўлишди. Улар орасидан биринчи бўлиб, бу лойиҳада Тошкент шаҳридаги 21-сон болалар мусиқа ва санъат мактаби қатнашиб, эски автобусни утилизацияга топширди ва ўзининг экология ҳамда табиатни асрашга бефарқ эмаслигини намойиш этди.

Автомобильларни утилизацияга топшириш учун қуйидаги учта оддий босқичдан ўтиш лозим:

• Автомобильни ЙҲХББ ҳисобидан утилизация учун ўчиртириш. Бунда вақтингизни тежаш учун «Табиатга имкон беринг» лойиҳаси ходимлари барча ҳужжатларни тайёрлашда ёрдам беришади;
• Лойиҳанинг қўнғироқлар маркази билан +998(71) 122-77-22 рақам орқали боғланиб, автомобилни утилизация қилиш ҳақида операторга ариза қолдириш;
• Белгиланган вақтда эвакуаторни кутиб олиш ва утилизация қилинадиган автомобилининг олдига йўналтириш.

Реклама ҳуқуқи асосида