«Ўзбеккино» миллий агентлиги бош директори Фурқат Зокиров 22 сентябрь куни Хитой элчиси Сун Лицзени қабул қилди. Агентлик матбуот хизмати хабарига кўра, учрашувда ўзбек ва хитойлик киноусталарининг ўзаро ҳамкорлигини йўлга қўйиш, тажриба алмашиш, ҳамкорликда фильмлар суратга олиш каби амалий ишлар муҳокама қилинди.
Томонлар яқин орада Тошкент шаҳрида ўтказилиши кутилаётган «Хитой киноси кунлари» фестивали ҳақида ҳам суҳбат қурди. «Ўзбеккино» миллий агентлиги ушбу тадбирни юқори савияда ташкил этилишида яқиндан кўмаклашади.
Фурқат Зокиров элчи билан суҳбатда ҳозирда ўзбек киносини ривожлантириш, тизимни ислоҳ қилиш йўлида катта ишлар амалга оширилаётгани, тегишли қарорлар қабул қилинганини қайд этди. Шунингдек, у Хитой киноиндустриясининг бугунги ютуқларини қайд этиб, «Ўзбеккино» бу борада тажриба алмашишдан манфаатдор эканлигини айтиб ўтди.
Элчи ҳам Хитой томони маданият, хусусан, кино соҳасидаги ҳамкорликка доим тайёр эканини маълум қилди. Элчи ўзбек киносининг бой тарихга эга эканини таъкидлаб, «Маҳаллада дув-дув гап», «Сен етим эмассан» каби фильмларни кўрганини ёд олди ва уларни нодир киноасарлар деб атади.
Сун Лицзе «Ўзбеккино» мутасаддиларини Хитойда ўтадиган халқаро кинофестивалда иштирок этиш учун таклиф қилди. «Ўзбеккино»нинг Халқаро алоқалар бўлими бошлиғи Ася Батраева эса декабрь ойида ўтадиган «PROlogue» ёш киноижодкорларнинг қисқа метражли фильмлари III Республика фестивалида Хитой киноларини иштирок этишга таклиф қилди.
Учрашув якунида «Ўзбеккино» раҳбари меҳмонга эсдалик совғсини топширди.
Изоҳ (0)