Болгариялик ғаввос аёл Грецияда жаҳон рекордини ўрнатиш вақтида ҳалок бўлди, унинг турмуш ўртоғи эса кессон касаллиги билан шифохонага етказилди. Бу ҳақда Греция ОАВларига таяниб, «РИА Новости» хабар берди.
Нохуш ҳодиса 24 сентябрь, якшанба куни Халкидики яриморолидаги Неoс Мармарисда содир бўлган.
Афина ахборот агентлиги АMHА’нинг хабар беришича, гап Болгариялик эр-хотин ҳақида кетмоқда. Сувга шўнғиш вақтида аёл номаълум сабабларга кўра йўналишни йўқотиб қўйиб ҳалок бўлган.
Halkidikifocus сайтининг маълум қилишича, дайвинг мактабига эга ушбу эр-хотин кислород баллонлари ёрдамида гуруҳ бўлиб сувга шўнғиш бўйича жаҳон рекордини ўрнатмоқчи бўлишган. Шўнғиш вақтида аёлнинг аҳволи ёмонлашган ва у вафот этган. Шу билан бирга аёлнинг 47 ёшли турмуш ўртоғини аҳволи ҳам ёмонлашиб қолган, жамоанинг бошқа аъзолари эса 10 метрлик чуқурликда уч соат туришга муваффақ бўлган.
2014 йилда Гиннес рекордлар китоби ҳаками Талал Омар мисрлик Аҳмед Гамал Габр сув остига шўнғиш бўйича рекорд ўрнатганини маълум қилганди. У 332,35 метр чуқурликка 12 дақиқа ичида шўнғиган, бироқ сув юзасига чиқишига деярли 15 соат вақт кетган — хавфсизлик нуқтаи назаридан шундай қилинган.
Изоҳ (0)