Андижон вилояти ҳокими Шуҳрат Абдураҳмонов вилоят фаоллари билан пахта йиғим-теримига бағишланган йиғилиш ўтказди. Йиғилиш тафсилотлари, ҳокимнинг ундаги нутқи Андижон телевидениеси орқали намойиш этилган. Репортаждан лавҳалар ва парчалар ижтимоий тармоқларда пайдо бўлди.
Йиғилишда ҳоким Абдураҳмонов тиббиёт ходимлари, таълим соҳаси вакиллари, ўқитувчилар, ўқувчилар ва талабаларнинг пахтага чиқарилишни жиноят деб атаган, ўзига бириктирилган ҳудудда шу тоифага кирувчи шахслар пахта тераётгани аниқланган масъул раҳбарларни эса жиноий жавобгарликка тортиш билан огоҳлантирган.
Яна бир бор қайтаряпман, бугундан бошлаб Андижон вилояти бўйича 18 ёшга тўлмаган фуқароларнинг, бюджет ташкилоти ходимларининг, асосан, мактаблар бўйича — ўқитувчилар, ўқувчилар, ходимларнинг, тиббиёт ходимлари — шифокорлар, ҳамширалар ва ходимларнинг, ўрта махсус ўқув юртлари, коллежлар бўйича — ўқитувчилар, ўқувчилар, ходимларнинг, олий ўқув юртлари бўйича — ўқитувчилар ва талабалардан бирортасининг далага чиқиши — бу жиноят!Қайси туманда, қайси секторнинг ҳудудида мана шу тоифа ходимлар далада пахта тераётгани аниқланадиган бўлса, раҳбарга нисбатан нафақат лавозимидан озод этиш, балки жиноий жавобгарликкача торттириш ҳақида огоҳлантираман.
Шуҳрат Абдураҳмонов, Андижон вилояти ҳокими
Изоҳ (0)