Швециянинг Telia Company телекоммуникация холдинги Ўзбекистондаги коррупциявий тўловлар бўйича иш доирасида 965 миллион доллар жарима тўлайди. Бу ҳақда компания сайтида маълум қилинди, дея хабар беради UZ24.
Жарималар аксилкоррупциявий текширувни олиб борган АҚШ Адлия вазирлиги, Қимматли қоғозлар ва биржалар бўйича комиссия, шунингдек, Нидерландия прокуратурасига тўланади. Компания икки мамлакат расмийлари билан 21 сентябрь, пайшанба куни келишувга эришди.
Текширув доирасида АҚШ ва Нидерландия расмийлари компанияни хорижда коррупция ҳақидаги қонунни бузганликда айблади. АҚШ Адлия вазирлиги сайтида жойлаштирилган баёнотда Telia ва унинг маҳаллий шўъба корхонаси— Coscom LLC Ўзбекистондаги телекоммуникация тармоғини назорат қилган ҳукумат органига таъсири бўлган юқори мартабали мансабдорга яқин давлат хизматчисига 331 миллион доллар пора берганликларини тан олгани билдирилган.
Компания Ўзбекистон бозорига кириш, Coscom учун қимматли телекоммуникация активларини олиш ва фаолиятини давом эттириш учун 2007—2010 йилларда бир неча бор пора берган. Поралар Telia ва Coscom менежерлари ҳамда ходимлари, шунингдек, аффилланган шахслар орқали етказилган.
Маълумот учун, Ўзбекистон телекоммуникация бозоридаги коррупция бўйича кенг кўламли текширувлар Нидерландия, Швеция ва Швейцария расмийлари томонидан 2012, АҚШ тарафидан эса 2014 йилда бошланганди.
Изоҳ (0)