Тошкент шаҳар Мирзо Улуғбек туманида яшовчи Илҳом Ҳайитов оиласини икки нафар фарзанди билан ташлаб кетган. Фарзандларига моддий ёрдам — алимент тўлашдан бўйин товлаб, саккиз йил давомида изсиз йўқолган.
ЎзА томонидан хабар берилишича, Мирзо Улуғбек туманидаги Тошкент шифокорлар малакасини ошириш институти биносида бўлиб ўтган сайёр судда Илҳом Ҳайитовнинг жиноий иши кўриб чиқилди.
Илҳом Ҳаитов турмуш ўртоғи билан ажрашган пайтда, яъни 2006 йилнинг октябрь ойида фуқаролик ишлари бўйича Тошкент шаҳар Мирзо Улуғбек туманлараро судининг буйруғига асосан Рушана (Ҳайитова) Камоловага икки нафар фарзандининг вояга етгунига қадар иш ҳақи ва бошқа даромадларидан учдан бир қисми миқдорида алимент тўлаши белгиланган эди.
Аммо у қонуний бурчини бажаришдан очиқчасига бош тортиб, қўшни Қозоғистон давлатига кетиб қолган ва орадан саккиз йил ўтиб қайтиб келган.
Рушана Камолова фарзандларининг отаси қайтиб келганини билгач, ўтган йиллардаги алимент тўловидан воз кечди ва бундан буёғига тўлашини сўраб, судга яна ариза берди. Мазкур аризага асосан 2014 йил февраль ойида Илҳом Ҳайитовга нисбатан алимент тўлаш бўйича суднинг янги буйруғи чиқди.
Бироқ доимий огоҳлантириш бериб турилганига қарамай Илҳом Ҳайитов бу сафар ҳам алимент тўламади. Бунинг оқибатида унинг алимент қарзи жорий йилнинг 15 августига қадар 13 миллион 783 минг сўмни ташкил этди.
Сайёр суд залида Илҳом Ҳайитовга алимент қарзини тўлаш таклифи билдирилди. Лекин у пулни тўлашни истамади. Вояга етмаган фарзандларини моддий таъминлашдан бош тортганлиги учун Илҳом Ҳайитов Ўзбекистон Республикаси Жиноят кодексининг 122-моддасига мувофиқ бир йил муддатга озодликдан маҳрум этилди.
Судланувчидан жабрланувчи Рушана Камолова фойдасига тўпланган қарз ундирилиши белгиланди.
Изоҳ (0)