15 сентябрь куни соат 01:00 да пойтахтнинг Чилонзор туманида йирик ЙТҲ рўй берди. Бунёдкор кўчасида 21 ёшли қиз Lacetti машинасида йўл четидан кетаётган тўрт пиёдани уриб юборди. Бу ҳақда «Новости Узбекистана» хабар бермоқда.
Пиёдалардан бири — 25 ёшли йигит воқеа жойида ҳаётдан кўз юмди. Унинг уч дўсти Республика тез тиббий ёрдам марказига етказилди.
Пиёдаларни уриб кетгач, қиз ёнидан ўтаётган Nexia автомашинаси билан тўқнашиб кетди. Икки машина ҳайдовчилари ва йўловчилари жабрланмади.
Тошкент шаҳар ИИББ ЙҲХБ матбуот хизмати қиз дўстининг автомобилини бошқараётганини, унинг ёнида ҳайдовчилик гувоҳномаси бўлмаганини билдирди. Машинанинг эгаси ҳайдовчининг ёнидаги ўриндиқда ўтирган эди. ЙТҲ вақтида машинани бошқараётган қиз маст эмас эди.
Ҳозирда мазкур ҳолат юзасидан Чилонзор тумани ИИБ ҳузуридаги Тергов бўлими томонидан Ўзбекистон Республикаси ЖКнинг 266-моддаси 2-қисми (транспорт воситалари ҳаракати ёки улардан фойдаланиш қоидаларини бузиш одам ўлишига сабаб бўлиши) аломатлари билан жиноят иши қўзғатилиб, дастлабки тергов ҳаракатлари олиб борилмоқда.
Изоҳ (0)