АҚШ президенти Дональд Трамп 11 сентябрь, душанба куни терактлар хавфи муносабати билан мамлакатдаги фавқулодда ҳолат тартибини яна бир йилга узайтирди. Бу ҳақда Оқ уй матбуот хизматига асосланиб, «Корреспондент.net» хабар берди.
«Мен 2001 йил 14 сентябрда эълон қилинган фавқулодда ҳолат тартибини бир йилга узайтираман», − дейилади Америка президентининг баёнотида.
У «2001 йилнинг 14 сентябрида эълон қилинган фавқулодда ҳолат тартиби ва бу билан боғлиқ ваколатлар террористик хавф давом этаётгани боис 2017 йилнинг 14 сентябридан кейин ҳам ўз кучида қолиши кераклиги»ни таъкидлади.
Қайд этилишича, мазкур тартиб 2001 йилнинг 11 сентябрида АҚШда содир этилган терактлар ва мамлакатга қарши янги ҳужумлар хавфи муносабати билан жорий этилган.
Эслатиб ўтамиз, 2001 йилнинг 11 сентябрида АҚШда ҳозирги давр тарихидаги энг йирик теракт юз берган эди.
«Ал-Қоида» террорчилик гуруҳи жангарилари тўрт фуқаролик авиацияси самолётини эгаллаб олди.
Улардан бири Нью-Йоркдаги машҳур Бутунжаҳон савдо марказининг шимолий минорасига урилди. Иккинчиси мажмуанинг иккинчи минорасига ҳужум қилди.
Учинчи лайнер Пентагон биносига келиб солди, тўртинчиси эса йўловчилар террорчиларга қаршилик кўрсатгани боис Питтсбург яқинида (Пенсильвания штати) қулади.
Ҳужумлар оқибатида уч мингга яқин киши ҳалок бўлди. Яна тўрт мингдан ортиқ киши жароҳатланди.
Изоҳ (0)