Ўзбекистон Президенти Шавкат Мирзиёев 9-сентябр куни Хитой Коммунистик партияси Марказий қўмитаси сиёсий-ҳуқуқий комиссияси котиби, Ўзбекистон—Хитой ҳукуматлараро ҳамкорлик қўмитаси ҳамраиси Мэн Цзяньчжу бошчилигида Қўшма қўмитанинг навбатдаги мажлисида иштирок этиш учун Ўзбекистонга келган Хитой ҳукумати делегациясини қабул қилди.
ЎзАнинг хабар беришича, Шавкат Мирзиёев меҳмонни самимий қутлар экан, Ўзбекистон ва Хитой ўртасида ўзаро манфаатли, кўп қиррали ҳамкорлик изчил ривожланаётганини чуқур мамнуният билан қайд этди.
Учрашувда Ўзбекистон ва Хитой ўртасидаги амалий ҳамкорлик, биринчи навбатда, савдо-иқтисодий, сармоявий, молиявий ва транспорт-коммуникация соҳаларидаги алоқалар истиқболлари муҳокама қилинди.
Олий даражадаги келишувларнинг тўла бажарилиши ҳамда иқтисодиётнинг юқори технологияли тармоқларидаги янги лойиҳаларни амалга оширишда Ўзбекистон—Хитой ҳукуматлараро ҳамкорлик қўмитаси алоҳида ўрин тутиши қайд этилди.
Мэн Цзяньчжу Ўзбекистон Президенти Шавкат Мирзиёевга қабул учун самимий миннатдорлик билдирди, Хитой раҳбари Си Цзиньпиннинг саломи ва эзгу тилакларини етказди.
Хитой Ўзбекистон билан ҳар томонлама стратегик шериклик муносабатларини янада мустаҳкамлашга тайёр ва бундан манфаатдор экани таъкидланди.
Мавзуга доир: Шавкат Мирзиёев Қозоғистонга жўнаб кетди
Изоҳ (0)