Хонанда ва бошловчи Карен Гафуржанов нима учун актёрлик фаолиятида анчадан буён янгилик йўқлиги, асосан бошловчилик қилиб, клипларда суратга тушаётгани, фильмларда рол ижро этиш таклифларини рад қилаётганлигига ойдинлик киритди. Ижодкор бу ҳақда журналист Феруз Муҳаммад билан бўлиб ўтган суҳбатида маълум қилди.
— Менимча хонанда Райҳон билан биргаликда «Кечир» деб номланган фильмдан сўнг бошқа фильмларда суратга тушмай қўйдингиз. Бу таклиф йўқлигиданми ёки бошқа бир сабаб борми?
— Райҳон продюссерлигида суратга олинган «Кечир» фильмидан олдин ҳам кўплаб «Тоҳир ва Зуҳра», О. Генри асари асосида яратилган ва бошқа бир қанча қисқа метражли фильмларда рол ижро этганман. Бироқ, Райҳон билан биргаликда ижро қилган ролимдан сўнг бундай салбий роллардан йироқроқ юриш керакмикан деган фикрга тўхталдим (кулади).
— Бунинг сабаби нима?
— Кўпчилик фильмда ижро қилган салбий ролим қолиб, ўзимда ҳам ўша қаҳрамон образини қидира бошлади. Албатта мутахассислар образни маҳорат билан ижро қилинганлигини эътироф этишса-да, бироқ оддий томошабин бу ролим учун «дакки» ҳам берди. Бир куни йўлакда кетаётсам, ҳар доим мен билан сўрашиб кетадиган қизча дадасига қараб «Райҳонни урган ёмон одам», дея қўли билан мени кўрсатгани ҳали ҳануз эсимда. (Кулади)
Хуллас, Райҳонни уриб балога қолдим. Тўғри, фильмларда бошқа ўйнамаслигимга фақат бу сабаб бўлди деб айта олмайман. Бундан ташқари бошқа таклиф қилинган фильмлар ҳам ўша фильм негизидаги роллардан, ундай роллар эса менга ҳеч нарса бермасди. Шу сабабли барча таклифларни рад қилган эдим.
Биласизми, тарихий асарларни ўқиш жон-у дилим. Шунинг учун ҳам Широқ, Спитамен, ёки Мангуберди каби образларини акс эттирувчи ролларни ижро қилиш бутун умрлик орзум. Бироқ, ҳали бу каби таклифлар бўлгани йўқ.
Бугунги кунда асосий эътиборимни асосан хонандалик фаолиятимдан ташқари, барча учун севимли бўлиб улгурган «Milliy TV» телеканалининг «Ширчой» дастуридаги бошловчилигимга қаратганман. Биласизми, ахил жамоа муҳити, телеканалда ижод қилиш учун яратилган шароитлар доимо ҳар бир лойиҳа ва эфирга креатив ёндашишга ундайди. Қолаверса, клиплар, ижтимоий ва бошқа реклама роликларида суратга тушаяпман.
Масалан, яқинда хонанда Ҳадичанинг «Алдама» клипи, «Ўзбекинвест» экспорт-импорт суғурта компанияси, «Myday.uz» сайти ва бошқаларнинг бир қанча роликларидаги ижроларим шулар жумласидан.
Албатта, ижодкор одам учун бу каби муҳитдан нафас олиб яшаш жуда муҳим. Умид қиламанки, тез кунда ўз қўшиғимга ҳам клип оламан ва янгидан янги режадаги ғояларимга энг асосийси вақт топиб, ўз муҳлисларимни янада шод этаман.
Изоҳ (0)