Уйқу қандай қилиб озишга ёрдам беради?

Соғлом уйқу қандай қилиб парҳез сақлашга, машқ қилишни севишга ва ортиқча вазнни камайтиришга ёрдам беришини кўриб чиқамиз.

Тўйиб ухламаслик ортиқча ейишга олиб келади

Америкалик олимлар қуйидагича тажриба ўтказди: улар иккита тўрт кунлик сессияга кўнгиллилар гуруҳини таклиф қилди. Биринчи тўрт кун ичида қатнашчилар 8 соатдан, иккинчисида эса 4,5 соатдан ухлади. Бутун тажриба давомида улар бир хил таомларни еди, тўртинчи кун эса таомномага конфет, чипс ва печеньелар қўшилди. Қатнашувчилар кам ухлаган иккинчи сессиядан кейин уларда ширинлик ва зарарли тамаддиларга мойиллик кузатилди.

Яхши уйқу парҳез сақлашга ёрдам беради

2012 йилда Kaiser Permanente Center for Health Research тадқиқотчилари тажриба ўтказди. Унда 500 га яқин ортиқча вазнли кишилар қатнашди. Тажриба бошланишидан суткасига 6-8 соатдан ухлай бошлаган кишилар 6 соатдан кам ухлаган кишиларга қараганда икки марта тезроқ ўз вазнини камайтирди. Тўйиб ухлаган қатнашчиларда энергия даражасининг юқорироқ ва стресс даражасининг эса пастроқ эканлиги аниқланди.

Тўйиб ухлаш машқ қилишни севишга ёрдам беради

Кам ухлайдиган кишилар кўпинча югуришга чиқишнинг ўрнига телевизор қаршисида ярим соат бўлса ҳам ортиқча ўтиришни маъқул кўради. Бунга сабаб — машқ қилиш учун энергиянинг етишмаслиги.

Kaiser Permanente Center for Health Research тадқиқотчиси Чарльз Элдер:

Фаол тарздаги машғулотлар ва вазнни камайтириш кўп миқдорда энергия талаб қилади. Етарлича ухламаслик натижасида сизнинг кучларингиз эртами-кечми тугаб  қолади. Уйқу кун бўйига етадиган энергия билан таъминлайди, спорт билан шуғулланиш учун энергиянгиз етарли бўлсагина вазнни камайтириш анча осон бўлади.