Ўзбекистон томони «Озодлик» радиоси веб-саҳифасида 2017 йил 1 сентябрда «АҚШдаги ўзбек дипломатлари устидан президентга арз қилмоқдалар» сарлавҳаси остида чоп этилган мақолага эътибор қаратди. Бу ҳақда Ўзбекистон Ташқи ишлар вазирлиги матбуот хизмати 2 сентябрь куни маълум қилди.
«Шу муносабат билан маълум қиламизки, Вашингтон шаҳрида бўлиб турган республика ТИВнинг масъул ходими Қадамбой Султоновга мактубдаги масалаларни муҳокама қилиш учун муаллиф билан учрашиш ваколати юклатилган», — дейилади ТИВ баёнотида.
ТИВ ўз ахборотида «Озодлик» радиоси веб-сайтида мақолага асос бўлган баёнот муаллифи М.Халиковнинг манзили ва боғланиш учун бошқа маълумотлари келтирилмаганлиги сабабли, радио таҳририяти Халиков билан алоқа ўрнатишда Ўзбекистон томонига кўмак беришига умид билдирган.
Мақола айни вақтда АҚШда истиқомат қилиб келаётган Ўзбекистон фуқароси Мансур Халиков номидан Президент Шавкат Мирзиёевга битилган очиқ хатдир. Унда фуқаро Вашингтондаги Ўзбекистон консуллиги фаолиятидан шикоят қилган, хусусан, «сиёсий қочоқларнинг оила аъзоларига биометрик паспортларни беришдан бош тортаётганини» таъкидлаган.
Изоҳ (0)