Таниқли IHS Markit компанияси мутахассислари Samsung ширкатининг янги етакчи смартфони – Galaxy Note 8 модели қисмларининг таннархини ҳисоблаб чиқди. Бу ҳақида The Investor нашрига таяниб, «Mobinfo.uz» хабар берди.
Экспертларнинг ҳисоб-китобларига кўра, Galaxy Note 8 қисмларининг ялпи қиймати 350 долларга тенг. Маълумот ўрнида, Galaxy Note 7 моделини ишлаб чиқаришга 290 доллар кетган. Шу билан бирга, IHS Markit юқоридаги таннарх маркетинг харажатларини ҳисобга олмаслигини эслатиб ўтган.
Айни пайтда, сентябрда сотила бошланиши кутилаётган смартфоннинг чакана нархи 880—1000 долларни ташкил этади.
Эслатиб ўтамиз, Samsung Galaxy Note 8 6,3-дюймли Super AMOLED дисплей (2960 х 1440 пиксел), оптик барқарорлаштириш, светодиод ёритгичли Dual Pixel технологиясида ишлаб чиқилган икки 12-мегапикселли асосий камера, қуввати 3300 мА/соатга тенг аккумулятор билан жиҳозланган. Телефон Samsung Exynos 8895 процессори асосида ишлайди. Телефондаги тезкор хотира ҳажми 6 гигабайтга тенг.
Ўзбекистонда Galaxy Note 8’нинг сотувлари сентябрь ойида бошланиши кутилмоқда.
Изоҳ (0)