Кайфиятни кўтарувчи ва депрессия билан курашишга ёрдам берувчи 3 озиқ-овқат маҳсулоти

Кўпчилик оғир иш кунидан кейин стрессни ширинликлар билан босмоқчи бўлади, лекин уларнинг катта миқдори зарарли. Бундан ташқари бу депрессия ёки хавотирлик ҳолатларида ёрдам бермайди. Лекин олимлар баъзи озиқ-овқат маҳсулотлари мия фаолиятига ижобий таъсир кўрсатишини ва ёмон кайфият билан курашишда ёрдам беришини аниқлади.

1. Бутундонлилар

Бутундонли маҳсулотлар таркибида кўплаб триптофанлар — серотонин ва мелатонин гормонларини ишлаб чиқариш учун зарур бўлган аминокислоталар мавжуд. Серотонин кайфиятни яхшилайди ва сокинлаштиради, мелатонин эса уйқу даврини тартибга солиб туради. Тадқиқотлар натижаларига кўра, таркибида бутундонлилар кўп бўлган озиқ-овқатлар, шунингдек мевалар ва сабзавотлар билан қилинган парҳез кайфиятнинг тез-тез ўзгариб туриш ҳолатларини, хавотирлик ва депрессияни камайтиришга ёрдам бериши аниқланди.

2. Сут маҳсулотлари

Хавотирни ҳис қилиш кўпинча қондаги шакар миқдорининг камайиши билан боғлиқ бўлади. Лекин бу ширинлик ейиш керак дегани эмас. Яхшиси шакар қўшилмаган сут маҳсулотларини, масалан шакарсиз йогуртни танлаган маъқул. Унинг таркибида шакар миқдорини тартибга келтиришга ёрдам берувчи оқсил ва углеводлар миқдорининг ўзаро нисбати тўғри ташкил топган.

3. Аччиқ шоколад

Аччиқ шоколад — ажойиб табиий антидепрессант ҳисобланади. Унинг таркибида кейинчалик дофамин нейромедиаторига айланувчи тирозин аминокислотаси мавжуд. Маълумки дофамин миядаги хурсандчилик марказларини ривожлантиришга ёрдам бергани учун у бизнинг ҳиссий ҳолатимиз билан узвий равишда боғланган.

Шоколад таркибидаги какао кайфиятни кўтаришга ёрдам берувчи серотонин ишлаб чиқарилишини таъминлайди. Бундан ташқари, аччиқ шоколад кортизол миқдорини пасайтиради, бу эса ўз навбатида стресс ва депрессиянинг йўқолишига олиб келади.

Манба: «Zdorovie.com»