31 август куни бўлиб ўтадиган Ўзбекистон миллий терма жамоасининг Хитойга қарши ўйинини шарҳловчи Хайрулла Ҳамидов шарҳлаб боради. Бу ҳақдаги саволга Ҳамидов ижобий жавоб қайтарди. Шарҳда, шунингдек, Дилшодбек Тўхтабеков иштирок этади.
Хитой — Ўзбекистон ўйини Тошкент вақти билан 17:00 да старт олади. «Спорт» телеканали эса трансляцияни 1 соат олдинроқ бошлашни режалаштирган. Ўйинга қадар студия орқали муҳокама бўлади, унда таниқли мутахассисларнинг иштирок этиши кутилмоқда.
Хайрулла Ҳамидов сўнгги бор 2007 йил Ўзбекистон миллий терма жамоаси иштирокидаги ўйинни шарҳлаб борганди. Унинг айниқса Кувайтга қарши иродали ғалаба билан якунига етган (3:2) ўйин шарҳи, ЖЧ саралашлари доирасидаги эсдан чиқмайдиган Баҳрайн билан тўқнашув вақтидаги шарҳлари ўзбекистонлик футбол мухлисларининг ёдида сақланиб қолган.
«Спорт»даги манбанинг «Дарё»га маълум қилишича, телеканал журналист Фаррух Расуловни миллий терма жамоа билан Хитойга юборган. Ўйин куни Расулов ҳамда Тошкентдаги студия ўртасида мулоқот бўлиб ўтади ва футболчиларнинг ўйинолди ҳолати борасида савол-жавоб бўлади.
Изоҳ (0)