«Дарё» таҳририятига Самарқанд шаҳридаги мактабгача таълим муассасаларидан бирида тарбиячининг ёрдамчиси болаларга нисбатан қўпол муносабатда бўлаётгани акс этган видеоёзувлар тақдим этилди.
Видеоёзув 25 июль куни шаҳар вокзали яқинидаги 64-мактабгача таълим муассасасида олинган. Видеода тарбиячининг ёрдамчиси болаларга музқаймоқ ва тарвуз тарқатиш давомида уларга қўл кўтараётгани акс этган.
Видеоёзувни тақдим этган фуқаронинг «Дарё»га маълум қилишича, 7 август куни жиянини боғчадан олиб кетиш учун борганида, тарбиячининг ёрдамчиси полда чўзилиб ухлаб ётган ва алкоголь ичимлик таъсирида бўлган.
Фуқаро бир кун ўтиб ушбу ҳолат юзасидан боғча мудирасига шикоят қилган. Тарбиячининг ёрдамчиси ҳам, боғча мудираси ҳам фуқаронинг шикоятида келтирилган даъволарни рад этган.
«18 август куни жиянимни бошқа боғчага ўтказдик. Боғчага боргиси келмайдиган бола энди ўзи хоҳлаб боғчага кетяпти. Эски боғчасидаги тарбиячиларнинг муносабати яхши эмаслигини шундан ҳам билса бўлади», — дейди фуқаро.
Аввалроқ Сурхондарё вилояти Денов туманидаги мактабгача таълим муассасаларидан бирида тарбиячиларнинг болаларга қўл кўтараётгани акс этган видеоёзувлар интернетда тарқалган эди. Кейинчалик Ўзбекистон ички ишлар вазири Абдусалом Азизов 2016 йил сентябр ойида бўлган мазкур воқеа юзасидан изоҳ берган эди.
Мавзуга доир:Ички ишлар вазири Деновдаги боғчада ва Фарғонадаги мактабда юз берган ҳолатга муносабат билдирди
Бундан ташқари, 16 август куни Навоий шаҳридаги болалар боғчаларидан бирининг тарбиячиси болаларга қўл кўтаргани учун кўп ўтмай ишдан ҳайдалгани маълум бўлган эди.
Изоҳ (0)