Қирғизистоннинг Чолпон-Ота шаҳрида 24 август куни Шанхай ҳамкорлик ташкилотига аъзо давлатлар фавқулодда вазиятлар олдини олиш ва бартараф этиш масалалари билан шуғулланувчи идоралари раҳбарларининг 9-йиғилиши бўлиб ўтди. Бу ҳақда Ўзбекистон ФВВ матбуот хизмати маълум қилди.
Йиғилишда Ҳиндистон, Хитой, Покистон, Россия, Ўзбекистон, Қозоғистон, Қирғизистон ва Тожикистон Фавқулодда вазиятлар вазирлари, тегишли мутахассислари, ШҲТ котибияти, шунингдек, таклиф қилинган меҳмонлар сифатида Халқаро фуқаро мудофааси ташкилоти ҳамда Фавқулодда вазиятлар ва табиий офатлар хавфини камайтириш маркази раҳбарлари иштирок этди.
Тадбир давомида иштирокчилар ШҲТга аъзо давлатларда 2015—2017 йиллар мобайнида содир бўлган йирик фавқулодда вазиятлар, улар келтирган талофатлар, келгусида юзага келиши мумкин бўлган фавқулодда вазиятларнинг олдини олиш ва бартараф этиш соҳасидаги истиқболли ҳамкорлик масалалари муҳокама қилинди.
Куннинг иккинчи ярмида Ўзбекистон ва Россия Фавқулодда вазиялар вазирлари Р.Жўраев ва В.Пучковларнинг учрашуви бўлиб ўтди. Учрашув давомида 2017—2018 йилларга мўлжалланган фавқулодда вазиятларнинг олдини олиш ва бартараф этиш соҳасида ҳамкорлик қилиш бўйича тадбирлар режаси имзоланди. Икки томонлама ҳамкорликни ривожлантириш масалалари, мазкур режани амалга ошириш чоралари хусусида ўзаро фикр алмашилди.
Ўзбекистон Фавқулодда вазиятлар вазири Р.Жўраев Фуқаро мудофааси халқаро ташкилоти бош директори В.Кувшинов билан ҳам учрашди. Учрашувда 2018—2020 йилларга мўлжалланган Ўзбекистон Республикаси ва Фуқаро мудофааси халқаро ташкилоти ўртасида аҳоли ва ҳудудларни табиий ва техноген хусусиятли фавқулодда вазиятлардан муҳофаза қилиш соҳасида ҳамкорлик бўйича тадбирлар режаси имзоланди.
Йиғилиш якунида ШҲТга аъзо давлатлар фавқулодда вазиятларнинг олдини олиш ва бартараф этиш масалалари билан шуғулланувчи идоралари раҳбарларининг 9-йиғилиши баёни имзоланди.
Изоҳ (0)