Футбол журналистларини очиқдан-очиқ ҳақорат қилаётган ЎФФ ходими ишдан бўшатилиши талаб қилинмоқда

Ўзбекистон футбол федерациясининг халқаро бўлимида фаолият кўрсатиб келаётган Шерзод Игамбердиев ўзининг Facebook саҳифасида ўзбекистонлик футбол журналистларини навбатдаги бор ҳақорат қилди ва уларни «қишлоқи» деб атади.

Гап бунда Қатар ва Туркманистон терма жамоалари ўртасидаги учрашувнинг ёпиқ эшиклар остида ўтгани ҳақида боради. Сир эмаски, худди шунингдек Ўзбекистон миллий терма жамоаси ҳам бугун — 25 август куни Қирғизистон термасини ёпиш эшиклар ортида қабул қилади ва учрашувга мухлисларни ҳам, журналистларни ҳам киритмайди.

Бунга қадар ЎФФ вазият ФИФА талабидан келиб чиққани ҳақида баёнот берган бўлса, кейинроқ бир қатор футбол журналистлари бунинг ҳақиқатга зид эканини исботлаб берганди.

Игамбердиев бунга қадар ҳам футбол журналистларини бир неча бор Facebook саҳифаси орқали ҳақорат қилган. Шунга қарамай, одатда унинг айтганлари нотўғри чиқиб, журналистлар билдирган фикр ўринли бўлиб чиқади.

Жумладан, Игамбердиев Ўзбекистон Таиланд билан ўйнамаслиги ҳақида бонг уриб, бу ҳақда ёзган журналистларни ҳақорат қилганди, деб ёзди «Kun.uz» нашри. Орадан кўп ўтмай ўзбекистонликлар чиндан ҳам Таиландга қарши майдонга тушди.

Таиландга қарши ўйин биз учун фойдали бўлмайди деб ҳисоблаган журналистлар яна ҳақорат қилинди. Кейинроқ бу ҳақиқат бўлиб чиқиб, Самвел Бабаян жамоаси Эронга қарши ўйинда ҳеч нарса қила олмади. Игамбердиев эса Бабаянга ҳайкал қўйишни таклиф қилди.

Ғалати бўляпти, Президент давай журналистлар деса,Ченовниклар журналистларни окам дейишворяпти, танқид қилса, қишлоқи деб хақорат қилишяпти)

— Shuhratbek (@Almuniya_) August 24, 2017

Виталий Денисовнинг Қатарга қарши ўйинда майдонга туша олмаслиги ҳақида ёзган журналистлар ҳам ҳақорат қилинган бўлиб, кейинроқ Денисов чиндан ҳам ўйинга тушмаган. Буларнинг ҳеч бирида Игамбердиев узр сўрашни ўзига эп билмган.

https://twitter.com/Shef_uz/status/900781443265294336

Мазкур мавзу юзасидан бир қатор спорт журналистлари кескин фикр билдирди. Кейинроқ улар бирлашиб, ЎФФ раҳбариятига очиқ мурожаат билан чиқди. Унга кўра, Игамбердиев ё расмий сайтда барча журналистлардан узр сўраши керак ёки бўлмаса ишдан бўшатилиши шарт.

https://twitter.com/achchi_/status/900808672162525184

Аввалроқ ЎФФ вице-президенти Сардор Раҳматуллаев Халқаро пресс-клубда чиқиш қилиб, ЎФФ ходимининг бу қилиқлари ҳақидаги саволга ҳеч нарса билмаслиги ҳақида айтган ва бундан кейин бу каби ҳолатлар такрорланмаслиги, ЎФФ шаффоф ишлаши ҳақида бонг урганди.

Игамбердизода роса ўзидан кетибди.
Нодирхўжа билан тўлиқ согласенман шу сафар pic.twitter.com/PN1w4lBk9S

— Shuhrat Shokirjonov (@shokirjonov) August 24, 2017

Шунга қарамай, ЎФФ футбол мухлисларига шаффоф ташкилот эканлигини исботлай олмаяпти. Бунга қадар ташкилот ўз низомига амал қилмай, ЎФФ президентлиги сайловининг аниқ санасини белгилаб қўйилганидан кеч эълон қилганди. Шунингдек, ҳозирга қадар президентлик учун номзодлар номи ошкор қилинмаган. Сайлов эса 12 сентябрь куни бўлиб ўтади.

Айни пайтда барча футбол журналистлари Шерзод Игамбердиев масаласида ЎФФ баёнотини кутмоқда.