Самарқандда Ўзбекистон Биринчи Президенти Ислом Каримовнинг мақбарасини бунёд этиш ва унинг ҳайкалини ўрнатиш ишлари якуний босқичга кирган. Бу ҳақда самарқандлик журналист Тошпўлат Раҳматуллаев ўз блогида маълум қилган.
Хабар беришларича, қурилиш ва ободонлаштириш ишлари туну-кун давом этмоқда: уч сменада 2 мингдан зиёд ишчи меҳнат қилмоқда.
Хабар беришларича, мақбарани ташқи пардозлаш ишлари қарийб якунига етган, фақат гумбаз қисмида озгина иш қолган. Мақбаранинг ички қисмида эса иш қизғин.
Самарқанд вилояти ҳокими ўринбосари Олим Очиловнинг сўзларига кўра, бу ерда ҳиндистонлик усталар иш олиб бормоқда, мақбарада фойдаланилган қимматбаҳо тошлар ҳам Ҳиндистондан олиб келинган.
Қолган барча ишлар маҳаллий усталар томонидан бажарилмоқда. Ёғоч ўймакорлиги билан боғлиқ барча ишлар Ўзбекистон халқ устаси Насрулло Соҳибназаров ва Миржалол Асадов томонидан шогирдлари билан бирга, шунингдек, қўқонлик Муҳаммадамин иштирокида бажарилмоқда.
Ганч ўймакорлиги бўйича ишлар Ўзбекистон халқ устаси Мансур Муродов ғамда Амриддин Нажмиев томонидан бажарилмоқда. Майолика ва мозаика монтажи билан Раҳмон Тоҳиров бошчилигидаги гуруҳ шуғулланмоқда. Деворларни нақшлаш ишларида Ўзбекистон халқ устаси Абдуғани Каримов бошчилигидаги 68 киши банд.
Мақбара қурилиши билан бирга унинг атрофида ҳам катта ҳажмдаги ишлар бажарилмоқда, хусусан, мақбарага келадиган кўплаб ташриф буюрувчилар учун қулайликлар, шарт-шароитлар ҳозирланмоқда.
Мақбара атрофида айвон бунёд этилган, мақбара ёнида жойлашган Ҳазрати Хизр масжиди реставрация қилинмоқда. Шоҳи Зинда ва Ҳазрати Хизр қабристонлари деворлари янги кўриниш олмоқда.
Изоҳ (0)