Улуғбек Рўзиқулов бош вазир ўринбосари лавозимидан озод этилди

Ўзбекистон Президентининг 23 августдаги фармони билан Улуғбек Рўзиқулов «бош вазир ўринбосари — ‘Ўзавтосаноат’ акциядорлик компанияси бошқаруви раиси — ташқи иқтисодий фаолият, экспорт салоҳияти, машинасозлик, автомобиль ва электротехника саноатини ривожлантириш, маҳсулотларни стандартлаштириш масалалари комплексининг раҳбари» лавозимидан озод этилди.

Президентнинг 23 августдаги бошқа фармони билан Нодир Отажонов «бош вазир ўринбосари — ‘Ўзагротехсаноатхолдинг’ акциядорлик компанияси бошқаруви раиси — ташқи иқтисодий фаолият, экспорт салоҳияти, машинасозлик, автомобиль ва электротехника саноатини ривожлантириш, маҳсулотларни стандартлаштириш масалалари комплексининг раҳбари» лавозимига тайинланди.

1967 йилда таваллуд топган Нодир Отажонов 1993 йили Андижон қишлоқ хўжалиги институтини, 1998 йили Наманган муҳандислик-педагогика институтини, 2000 йили Банк-молия академиясини тамомлаган.

Нодир Отажонов 1993—2007 йилларда Ўзбекистон Молия вазирлиги тизимида меҳнат қилган. 2007—2010 йилларда «Ўзавтосаноат-лизинг» компаниясига раҳбарлик қилган. 2010 йил сентябрида «Ўзқишлоқхўжаликмашлизинг» лизинг компаниясига, 2016 йил ноябрида эса «Ўзагросаноатхолдинг» таркибида қайта ташкил этилган «Ўзагролизинг» компаниясига раҳбар этиб тайинланган эди.