Усмоновнинг шериги яширинча тинглаш тизимини яратиш учун генералларни ишга олади

Ахборот хавфсизлиги соҳасида фаолият юритувчи, шу жумладан, тезкор-қидирув тадбирлари тизимини яратишга алоқадор компанияларни бирлаштирувчи «Цитадель» холдингига Россия ички ишлар вазирлигининг «К» бошқармаси собиқ бошлиғи Борис Мирошников вице-президент бўлди, деб ёзади «РБК» ўз манбаларига таяниб.

Генерал-полковник Борис Мирошников кўп йиллар давомида Россияда кибержиноятчиликка қарши курашган. 1990 йилларда Федерал хавфсизлик хизмати компьютер ва ахборот хавфсизлиги бошқармасини бошқарган. 2001—2011 йилларда ИИВнинг Махсус техник тадбирлар бюроси («К» бошқармаси) бошлиғи бўлган.

«Цитадель» холдингига 2015 йилда Антон Черепенников ва унинг шериклари асос солган. Черепенников ўзининг бошқа лойиҳаси туфайли танилган — унинг киберспорт соҳасидаги Virtus.pro компаниясига миллиардер Алишер Усмоновнинг USM Holdings холдинги инвестиция киритган.

«Цитадель» ишлаб чиқарадиган тезкор-қидирув тадбирлари тизими техник воситалар комплекси бўлиб, ундан Федерал хавфсизлик хизмати ва бошқа куч тузилмалари ўз эҳтиёжлари (яширинча тинглаш) учун фойдаланади ва уни Россиядаги барча алоқа операторлари ўз тармоқларига ўрнатишга мажбур.

Нашр манбасига кўра, кузда холдингга яна бир вице-президент — Сергей Ефремов келиши мумкин, у айни пайтда Федерал хавфсизлик хизмати Махсус техника маркази раҳбари генерал лавозимини эгаллаб турмоқда.