Ўзбекистон Президенти Шавкат Мирзиёев Бекобод шаҳридаги «Пахтакор» маҳалласида ташрифи чоғида оддий одамлар билан учрашди, самимий мулоқот қилди. «Биз бу ерга бекободликларнинг саволларига жавоб топиш, халқ бизга берган ишончни оқлаш мақсадида келганмиз» — деди Шавкат Мирзиёев.
«Бу ерда 50 мингга яқин аҳоли истиқомат қилади. Уларга 37 та хусусий уй-жой мулкдорлари ширкати хизмат кўрсатади», — деб ёзади Президентнинг Facebook’даги саҳифаси. Шавкат Мирзиёевга ҳудуд марказида бунёд этилиши кўзда тутилаётган Ягона ҳисоб-китоб маркази ва намунали маҳалла фуқаролар йиғини биноларининг лойиҳалари тақдим қилинди.
Шавкат Мирзиёев куз-қиш мавсумида хонадонларни иситиш лойиҳаси билан танишар экан, аҳолига қулай шароитлар яратиш мақсадида яқин келажакда Бекобод шаҳридаги барча хонадонларни иситиш мосламаси билан таъминлаш ишларини ташкил этиш юзасидан мутасаддиларга тегишли кўрсатмалар берди.
Изоҳ (0)