15 август куни Зимбабвенинг биринчи хоними Грейс Мугабе 20 ёшли моделга ташлангани сабабли ЖАР судида жавоб бериши маълум бўлди. Ҳужум сабаблари ҳозирча номаълум.
Давлат раҳбарларининг фарзандлари ва рафиқалари нима сабаблар туфайли судда жавоб беришга мажбур бўлганлиги «РБК» таҳлилномасида.
Суринами президентининг ўғли, «Ҳизбуллоҳ» ҳаракати базасини ташкил этиш режаси ва наркотиклар савдоси
2015 йилнинг мартида Суринами президентининг ўғли Дино Бутерсе Нью-Йорк суди томонидан 16 йиллик қамоқ жазосига ҳукм қилинди. Бунга унинг АҚШда террорчилик ташкилоти деб топилган «Ҳизбуллоҳ» ҳаракати базасини ташкил этиш режаси сабаб бўлди. У ҳаракат аъзоларига 2 миллион доллар эвазига базани ташкил этишни таклиф қилган. Суд жараёнида давлат раҳбарининг ўғли айбини тан олди. «Қилган ишларимдан ҳақиқатда жуда афсусдаман, жуда, жуда, жуда уятдаман», — деди у. Бутерсе, шунингдек, наркотиклар ва қурол-яроғ савдосидаги айбини ҳам тан олди.
Эрон собиқ президентининг қизи, ҳукуматга қарши тарғибот
2012 йилнинг январида Эрон собиқ президенти Али Акбар Ҳошимий Рафсанжонийнинг қизи ҳукуматга қарши тарғибот учун ярим йиллик қамоқ жазосига ҳукм қилинди. Жиноий жазога тортилишига Фаезе Ҳошимийнинг 2009 йилдаги халқ ғалаёнларидаги иштироки сабаб бўлди. 2017 йилнинг мартида собиқ давлат раҳбарининг қизи яна ярим йилга ҳукм қилинди — бу сафар суд тизими ва қўриқлов хизматини танқид қилгани учун.
Эрон собиқ президентининг ўғли, чет эл махсус хизматлари билан алоқалари ва тартибсизликлар ташкилотига алоқадорлик
Фаезенинг акаси, Эрон собиқ президентининг ўғли Меҳди Ҳошимий Рафсанжоний 2015 йилнинг мартида коррупция ва миллий хавфсизликка қарши жиноятларда айбланиб 15 йиллик қамоқ жазосига ҳукм қилинди. 2010 йилда Эрон суди оммавий тартибсизликларни ташкил этиш ва Британия махсус хизматлари билан алоқалари туфайли Британияда бўлган Меҳдини сиртдан ҳибсга олди. 2012 йилда у ватанига қайтди ва деярли шу заҳоти ҳибсга олинди.
Индонезия собиқ президентининг ўғли, қотиллик
2002 йилда Индонезия собиқ президентининг ўғли Томми Сухарто 15 йиллик қамоқ жазосига ҳукм қилинди. Бунга уни коррупцияда айблаб 1,5 йилга ҳукм қилган судьяни ўлдиришни уюштирганлиги сабаб бўлди. Воқеалар якунида Сухарто беш йилдан камроқ қамоқда бўлди — 2006 йилда у шартли равишда муддатидан олдин озод қилинди ва сиёсатга қайтди. Бир неча ой аввал Сухарто 2019 йилги президентлик сайловларида ўз номзодини қўймоқчи эканлигини маълум қилди.
Либерия собиқ президентининг собиқ рафиқаси, қийноққа солиш
2017 йилнинг 1 июнида Буюк Британияда қийноққа солишни ташкиллаштирган ва амалга оширган Либерия собиқ президенти Чарлз Тейлорнинг собиқ рафиқаси ҳибсга олинди. Тергов хулосасига кўра, Шарқий Лондонда истиқомат қилган Агнес Ривз Тейлор 1989—1991 йилларда давом этган фуқаролик урушидаги қийноққа солишларга алоқадор бўлган. У Чарлз Тейлор билан у президент бўлгунга қадар ажрашган эди.
Гондурас собиқ президентининг ўғли, наркотиклар савдоси
2016 йилнинг майида Гондурас собиқ президентининг ўғли Порфирио Лобо АҚШга кокаин партиясини олиб кириш мақсадини кўзлаган шартномадаги айбини тан олди. У 2015 йилда Гаитида қўлга олинган ва АҚШга келтирилган эди. Мазкур иш бўйича қарор 5 сентябрда чиқарилиши кутилмоқда.
Парагвай президентининг ўғли, муштлашув
2013 йилнинг октябрида Парагвай президенти Орасио Картеснинг катта ўғли Хуан Пабло Картес Майамидаги холасига тегишли дала ҳовлида қўлга олинди. Зиёфат кечасида меҳмонлардан бири Картес унинг кўзига ургандан сўнг полиция чақирган. ОАВларининг маълум қилишича, у маст ҳолатда бўлган. Кейинроқ Картес 1,5 минг долларга яқин гаров пули эвазига озод қилинган. «Бу менинг айбим билан бўлмаган бўлса-да кечирим сўрамоқчи эдим. Бу ҳаётимдаги энг ёмон кунлардан бири, тафсилотларига тўхталишни истамасдим», — дейди президентнинг ўғли.
Миср собиқ-президентининг ўғли, оммавий тартибсизликларда иштирок этиш
2016 йилнинг декабрида Муҳаммад Мурсийнинг ўғли Усама 2013 йилнинг августидаги оммавий тартибсизликларда иштирок этганликда айбланиб ҳибсга олинди. Тартибсизликларни тарқатиб юбориш чоғида юзлаб намойишчилар ҳалок бўлган эди. У Мисрда тақиқланган «Мусулмон биродарлар» ҳаракати томонидан ташкил этилган тартибсизликларда иштирок этиш, шунингдек, полиция, армия ва давлат муассасалари вакилларига нисбатан зўравонликка ундашда айбланди. Шу йилнинг августида Усама Мурсий қамоқда унинг ҳуқуқлари бузилаётгани: унга ўқишни якунлаш имкони берилмаётгани, ибодат қилиш ва қариндошлари билан учрашиш тақиқланганидан шикоят қилди.
Изоҳ (0)