БМТ бош котиби халқаро ташкилотнинг Малидаги миссиясига уюштирилган ҳужумни қоралади

БМТ бош котиби Антониу Гутерриш халқаро ташкилотнинг Малидаги миссиясига уюштирилган қуролли ҳужумни қоралади. Бу ҳақда «ТАСС» хабар бермоқда.

Гутерриш ўзининг ёзма баёнотида БМТ тинчликпарварларига ҳужум ҳарбий жиноят ҳисобланишини эслатди.

Миссиянинг Тимбукту шаҳридаги штаб-квартираси ва Дуэнзедаги лагерига 14 август, душанба куни уюштирилган ҳужум оқибатида бир нафар БМТ тинчликпарвари, маҳаллий жандарм ва Мали фуқароси бўлган 6 нафар қўриқчи, жами 8 киши ўлдирилди. Отишма давомида 6 нафар жангари йўқ қилинди.

БМТ бош котиби Мали ҳукумати ва қурбонлар оиласига ҳамдардлик билдирди, шунингдек, минтақада терроризм ва экстремизмга қарши курашнинг муҳимлигини таъкидлади.