Нью-жерсилик келин-куёв Майк ва Карен Туфо тўйларида олинган фотосуратларда рақс майдонида вақтичоғлик қилган икки кишини пайқаб қолди, деб ёзади Forum Daily.
Аммо бу жуфтликни на келин, на куёв таниган. Меҳмонларни залдаги столлар атрофига жойлаштириш билан шахсан ўзи шуғулланган келин улар зиёфатга чақирилмаган меҳмонлар эканлигини дарҳол тушунди.
Йигит ва қиз тантана билан банд бўлган келин-куёвдан узоқ юрган, аммо рақс майдонида фаол кўнгилхушлик қилган ва зиёфатдаги бошқа меҳмонлар билан мулоқотда бўлган.
Меҳмонлар сўзларига кўра, номаълум жуфтлик тантанани «жонлантирган», улар рақс майдонида диққат марказида бўлган ва меҳмонлар билан фаол тарзда суратга тушган.
Тўйнинг эртаси куни келин-куёвга чақирилмаган меҳмонларнинг сурати ва бир долларлик купюра илова қилинган мактуб келди. Унда «Табриклаймиз. Тўйингизга таклифсиз келганимиз учун кечиринг. Омад тилаймиз», — деб ёзилган эди.
Келин-куёвнинг бундан ҳеч ҳам жаҳли чиқмади, ахир чақирилмаган меҳмонлар уларнинг тўйига қўшимча қувонч ҳадя этиб, тадбирни янада унутилмас қилган эди-да. Келин-куёв улар билан танишишни жуда истади ва бу амалга ошди ҳам.
Бу воқеа ҳақида журналистлар ёзганидан кейин чақирилмаган меҳмон Карли Волфсон Facebook’да келиндан узр сўрашга қарор қилди. Унинг айтишича, йигити Ричи Барри билан биринчи учрашувини шу тарзда ўтказишга қарор қилишган.
Карен Туфо Волфсон ва Баррининг муносабатлари ривожланиб кетса, турмуш ўртоғи билан уларнинг тўйига ҳам таклифсиз боришга ваъда берди.
Изоҳ (0)