Ўлимидан кейин ҳам янги фильмларда чиққан актёрлар (фотогалерея)

AdMe таниқли актёрларнинг кино ва реклама роликларида «қайта тирилиши» билан боғлиқ қизиқарли воқеаларни тўплади.

Брюс Ли (1940—1973)

«Ўлим ўйинлари» (1978) фильмини суратга олиш ишлари Брюс Лининг вафотидан бироз аввалроқ бошланган. Фильм яратувчилари картинани чиқариш учун суратга олиб бўлинган материал етарли, деган қарорга келди. У актёрнинг ўлимидан 5 йил ўтиб, прокатга чиқди. Етишмаган саҳналарда Лининг гримдаги дублёрлари қатнашган. Шунингдек, кадрлардан бирида дублёр Брюс Лининг картондан кесиб олинган юзини тақиб олганини кўриш мумкин.

Оливер Рид, (1938—1999)

«Гладиатор» (2000) фильмида афсонавий устоз Проксимо ролини ўйнаган Оливер Рид суратга олиш ишлари тугашига 3 ҳафта қолганида юрак хуружидан кўз юмди. Уни компьютер графикаси, дублёрлар ва манекен ёрдамида «қайта тирилтиришди».

Марлон Брандо (1924—2004)

Марлон Брандо 2004 йилда вафот этди, аммо сўнгги ролини 2006 йилда — «Суперменнинг қайтиши» фильмида ўйнади. Бунда оригинал фильм учун суратга олинган материаллар ва компьютер графикасини ишга солишди. Марлон Брандонинг юзини компьютер модели билан мужассамлаштиришди ва ўтган асрнинг хомаки съёмкалари асосида жонлантиришди.

Хит Леджер, 1979—2008

Ҳаётидаги сўнгги фильм — «Доктор Парнаснинг тасаввур олами» (2009)ни суратга олиш якунланмасидан Хит Леджер фожиали тарзда вафот этди. Шундан сўнг жамоа сценарийга ўзгартириш киритиб, Леджернинг персонажини минг юзли қаҳрамонга айлантиришди. «Юз»ларни Жонни Депп, Колин Фаррелл ва Жуд Лоу ўйнади.

Одри Хепбёрн, 1929—1993

2013 йилда Galaxy (Dove) шоколади рекламасида Одри Хепбёрн қиёфасидан фойдаланишга қарор қилишди. Бунинг учун актрисанинг ўғилларидан рухсат олингач, унинг дублёрларини қидиришга киришишди. Натижада икки аёлни топишди: улардан бирининг юзи, иккинчисининг қомати Хепбёрнники билан максимал даражада ўхшаш эди.

Пол Уокер (1973—2013)

ЙТҲда фожиали тарзда ҳалок бўлган Пол Уокер «Форсаж-7» фильмининг барча саҳналарида суратга тушишга улгурмай қолди. Аммо муаллифлар бунинг ечимини топди.

Биринчидан, улар франшизанинг аввалги олтита қисми съёмкалари архивини қидириб, Пол Уокер иштирокидаги фойдаланилмаган саҳналарни топди. Иккинчидан, актёрнинг юзини чизиш учун компьютер технологиясидан фойдаланди. Учинчидан «Форсаж» оиласига актёрнинг укалари — Коди ва Калебни қабул қилишди.