2017 йилги гилос мавсумида АҚШ халқаро тараққиёт агентлиги (USAID) Европа ва Жанубий Осиёнинг янги экспорт бозорларига йўл очишда Ўзбекистондаги гилос етиштирувчи тадбиркорлар билан ҳамкорлик қилди. Бу йил қиймати 350 минг доллар бўлган 110 тонна ширин гилос Лондон ва Сингапурдаги харидорларга сотилди. Бу ҳақда АҚШнинг Ўзбекистондаги элчихонаси маълум қилди.
Бугунги кунда Ўзбекистон йилига 100 минг тонна гилос етиштириб, бу борада дунёда бешинчи ўринни эгаллаб турибди. Бундай муваффақиятли ўсишга USAID’нинг юқори қийматли боғдорчилик маҳсулотлари етиштиришга қаратилган қишлоқ хўжалиги секторини диверсификация қилишни қўллаб-қувватловчи лойиҳалари кўмаклашмоқда.
USAID лойиҳаси Ўзбекистоннинг 12 вилоятидаги 33 та туманда олиб борилиб, 2016 йилдан буён у қишлоқ хўжалиги маҳсулотлари сифати ва миқдорини ошириш, ишлаб чиқарувчилар учун янги бозорлар топиш ва қишлоқ хўжалигига оид таълим муассасаларини хусусий сектор билан боғлаш каби фаолиятни амалга оширмоқда.
1992 йилдан бери, USAID Ўзбекистонга 356 миллион доллардан ортиқ ёрдам кўрсатди.
Изоҳ (0)