Комиссия лотереяда 5 миллион доллар ютиб олган ғолибга мукофот топширишдан бош тортмоқда

Калифорния лотерея комиссияси Лонг-Бичда истиқомат қилувчи Уорд Томасга 5 миллион долларлик жек-потни топширишдан бош тортмоқда. Чунки ютуқли чиптани унинг вояга етмаган ўғли сотиб олган, деб хабар берди «Forum Daily».

WSVN’нинг маълум қилишича, эркак комиссияни судга берган.

Томаснинг ўғли отаси айтгани учун 2016 йилнинг октябрида ёқилғи қуйиш шохобчасидан бир нечта чипталарни сотиб олган.

Улардан бири эса ютуқли бўлиб чиққан.

Эркакнинг сўзларига кўра, у чиптани лотерея компаниясининг офисида тасдиқлатган, бироқ икки ойдан сўнг унга мукофотни топширишдан бош тортишган, чунки уни 16 ёшли ўғли сотиб олган. Ўйинда эса фақатгина вояга етганлар иштирок этиши мумкин.

Шунингдек, Томас ёқилғи қуйиш шохобчасидаги сотувчини ҳам судга берган, чунки у ўйинда вояга етмаган шахс иштирок этиши мумкин эмас дея огоҳлантирмаган ва унинг ўғлини ёшини сўрамасдан чипталарни сотган.