Қирғизистон президенти Алмазбек Атамбаев жиддий жиноятлар содир этганликда айбланаётган собиқ президент Қурманбек Бакиев ва унинг қариндошларига нисбатан амнистия қўлланилишига қарши эканлигини маълум қилди, деб хабар берди «Интерфакс».
«Жаниш Бакиевга нисбатан амнистия (собиқ президентнинг кичик укаси, унинг қўриқчилари бошлиғи)? У қанча одамларни ўлдирди, қийноқларга солди, Қурманбек Бакиев ҳам қанчадан қанча пулларни ўмарди», — деди Атамбаев матбуот анжуманида.
Атамбаевнинг қўшимча қилишича, «ундан Акаевни ҳам кечириш борасида сўрашмоқда». «Бизнинг «Кумтор» лойиҳасидаги улушимиз 67 фоизни ташкил этган эди, бироқ кейин 16 фоизга тушиб кетди. Бунинг учун мен Акаевни ҳеч қачон кечирмайман, у ўз оиласининг ҳаловати учун 100 тонна олтинни шундайлигича бериб юборди. Бизнинг нефтимиз ҳам, газимиз ҳам йўқ эди, аммо олтинимиз бор эди», — деди Атамбаев.
Шунингдек, Атамбаев Қирғизистонда «Максим Бакиевни жазолаш имконияти пайдо бўлгани»ни маълум қилди. «Мен барча сирларни оча олмайман, бироқ биз масалани ҳал қилишни баъзи ечимларини топдик. Ўйлашимча, Бакиев Буюк Британияда бўлса ҳам жазосини олади», — деди президент.
Қирғизистон собиқ президентлари Акаев ҳамда Бакиев 2005 йилнинг март ва 2010 йилнинг апрель ойида содир бўлган инқилоблардан сўнг мамлакатни тарк этишган. Акаев оиласи билан Москвада, Бакиев эса Минскда яшамоқда. Белорус республикаси собиқ президент ва унинг қариндошларини Бишкекка топширишдан бир неча бор бош тортган. Бакиевнинг кичик ўғли Максим иқтисодиёт соҳасидаги жиноятлари учун судланган, бироқ Буюк Британия ҳам уни Қирғизистонга топширишни истамаяпти.
Изоҳ (0)