Тошкент вилоятида бир неча фуқароларни алдаб, моддий манфаатдорлик эвазига ишларини битириб беришини айтиб, фирибгарлик қилган шахслар қўлга олинди. Бу ҳақда Тошкент вилояти ИИБ маълум қилди.
Ангрен шаҳрида жорий йилнинг 21 январидан 14 март кунига қадар бўлган вақт оралиғида Наманган вилоятида яшовчи, вақтинча ишсиз, 1979 йилда туғилган И.М. фирибгарлик йўли билан Бекобод шаҳрида яшовчи нафақахўр 1950 йилда туғилган Г.И.га Ангрен шаҳридаги хонадонлардан бирини унинг номига расмийлаштириб беришни ваъда қилган. И.М. нафақахўрдан бунинг эвазига 2300 АҚШ долларини олиб, шу кунга қадар қайтариб бермаган.
Шунингдек, 1960 йилда туғилган Қ.Э. фирибгарлик йўли билан 1981 йилда туғилган М.М.ни юқоридаги каби ваъдалар билан алдаб, ундан 1750 АҚШ долларини олиб, ўз эҳтиёжлари учун ишлатиб юборган.
Яна бир ҳолат 2017 йилнинг май ойида Бўка туманида юз берган. Олмалиқ шаҳрида яшовчи уй бекаси 1985 йилда туғилган Ф.Т. фирибгарлик йўли билан, 1972 йилда туғилган Н.А.ни «уй олиб бераман», деб алдаб, ундан 22 300 000 сўм олган. Ф.Т. қўлга киритилган пулларни ўз эҳтиёжига ишлатиб юборган.
Ҳозирда юқоридаги жиноятларда гумонланаётган фуқароларга нисбатан Ўзбекистон Республикаси Жиноят Кодексининг тегишли моддалари билан жиноят иши қўзғатилиб, тергов ҳаракатлари олиб борилмоқда.
Изоҳ (0)