Facebook ижтимоий тармоғининг Марҳабо Алимова исм-шарифли фойдаланувчиси «Президент Ш.М. Мирзиёев тарафдорлари ва қўллаш командаси» гуруҳида 20 июль куни Ўзбекистон давлат жаҳон тиллари университетида юз берган ҳодиса ҳақида хабар қолдирган, хабарга ҳодиса жойидан олинган видеоёзув илова қилинган.
Гуруҳда қолдирилган шикоятнинг муаллифи Халқаро журналистика факультетига ўқишга кириш бўйича ижодий имтиҳон натижаларидан қониқмай, апелляция бериш истагини билдирганида, университет ва факультет ходимлари томонидан қаршиликка дуч келганини маълум қилган.
Ассалому алайкум! Мен Тошкентдаги университетларнинг бирида бўлган адолатсизлик ҳақида ёзяпман. Мазкур ҳолат юзасидан чора кўрилишини хоҳлардим.Ушбу хабарга илова қилинган видеоёзувда телефонидаги камерани ёққан шикоят муаллифига қарата: «Шантаж қилмоқчимисииз?», маъносида фикр билдирганини эшитиш мумкин. Видео охирида эса кимлиги ҳозирча номаълум бўлан шахс (шикоятчига кўра — университет ходими) видеога олаётган фуқаронинг телефонига ташланганини кўриш мумкин. Қайд этиш жоиз, бутун видео давомида мазкур шахс юзини яширишга ҳаракат қилган.Биз 20 июль куни соат 9:30 ларда ижодий имтиҳон баҳоларини билиш учун университетга бордик. Баҳолардан қониқмай, апелляция бермоқчи эдик, лекин бўлган воқеаларни сўз билан тасвирлаб бера олмайман. Охир-оқибат, менга шу университет ходими куч ишлатиб (қўлларимни қаттиқ қайириб, ҳар хил ҳақоратли сўзлар билан ҳақоратлаб), телефонимни қўлимдан юлиб олди.
Улар ҳеч кимдан апелляция аризаларини қабул қилмаётган эди. Лекин биз билан содир бўлган жанжалдан сўнг, биринчи аризани 10:25 да рўйхатдан ўтказишди. Кейин ичкаридан хона тайёрлаб, ариза ёзиш учун шароит бор, деб шуни кўрсатишди. Шу шароитларни олдиндан тайёрлаб қўйишса ва бизга инсондек муомала кўрсатишса бўларди-ку!
Марҳабо Алимова, Facebook фойдаланувчиси
Мазкур ҳолат юзасидан на Ўзбекистон давлат жаҳон тиллари университети ва на Халқаро журналистика факультети муносабат билдирган. Ижтимоий тармоқ фойдаланувчилари эса иккига бўлинган. Бир гуруҳ фойдаланувчилар университет ходимларининг қўпол муомаласини танқид қилган.
«Ҳали бу мешқоринларга навбат келгани йўқ. Президентимизнинг ҳали булар билан шуғулланишга вақтлари бўлгани йўқ. Ҳали кўпчиликка имконият берилган, бироқ баъзилар бундан тўғри хулоса чиқариб ололмаяпти», — деб ёзган бир фойдаланувчи.
«Президентимиз айтганларидек, айрим домлаларнинг ўзини қайта ўқитиш керак. Нима қилаётганини, нима деяётганини билмай қоляпти, ёғ босиб кетганидан. Ёшларимизга қийин», — деб қўшимча қилган бошқа бир фойдаланувчи.
Баъзи фойдаланувчилар эса видеохабар муаллифи қолдирган мурожаатдаги имловий ва грамматик хатоларга ишора қилиб, у (ёки унга алоқадор инсон)нинг ижодий имтиҳондан йиқилгани тўғри бўлганини таъкидлаган.
«Арз қилишдан олдин саводингизни тўғриланг», — деб қатъий таъкидлаган фойдаланувчилардан бири.
«Имтиҳоннинг биринчи босқичидан нима учун ўта олмагани шу ердан ҳам маълум. У барибир ўқишга кира олмайди. Журналистларимиз бу қадар саводсиз бўлишини истамасдим», — деб ёзган яна бир фойдаланувчи.
«Ёзган мурожаатингизда хатолар жуда кўп. Шу сабабли имтиҳон саводли топширилганига катта шубҳам бор. Фарзандингиз яхшилаб тайёргарлик кўриб, кейинги йил қайта топширса, мақсадга мувофиқ бўларди», — деб қўшимча қилган бошқа фойдаланувчи.
Ўз навбатида, шикоят муаллифини шантажда айблаганлар ҳам топилади. «Тўполон ва шаллақилик қилиб, ҳаммани телефон ва Facebook билан қўрқитиб, ишни битириб юрадиган ноинсофлар ҳам кўпайиб кетди», — деб ёзган фойдаланувчилардан бири.
«Роса оммалашди-да бу телефон, интернет деганлари. Ҳожатхонагача қўйилди, қойил! Стол-стул йўқ бўлса ҳам, мана интернетда!», — деб киноя қилган бошқа фойдаланувчи.
Изоҳ (0)