Фаластин президенти Маҳмуд Аббос яҳудийлар ҳамда мусулмонлар муқаддас дея ҳисобловчи — Ибодатхона тоғи ҳудудидан металл буюмларни аниқловчи детекторлар олиб ташланмагунига қадар Исроил билан алоқалар вақтинча тўхтатилишини маълум қилди. Бу ҳақда Haaretz’га таяниб, «Газета.ru» хабар берди.
Шунингдек, у ҲАМАСни ушбу имкониятдан фаластинликларнинг миллий ярашувида фойдаланишга чақирди.
Фаластин раҳбари бу каби баёнот билан Қуддусдаги зўравонликлар ва Иордан дарёсининг Ғарбий соҳилида уч нафар фаластинлик ўлдирилганидан сўнг чиқди.
Al Jazeera телеканалининг маълумотларига кўра, қотиллик 21 июль куни содир бўлган. Биринчи фаластинлик Шарқий Қуддусда ўлдирилди, иккинчиси — жума намозидаги тартибсизликлар вақтида оловдан ҳалок бўлди, учинчиси эса — Иордан дарёсининг Ғарбий соҳилида Исроил ҳарбийлари билан юзага келган тўқнашув вақтида ўлди.
Шундай бўлса-да, Исроил ҳамда Фаластин ўртасидаги зиддият 14 июлда пайдо бўлган эди. Ўша вақтда уч нафар фаластинлик полициячи гуруҳига қарата ўқ узганди. Ҳужум уюштирганлар қўлга олинган ва шундан сўнг Исроил Ибодатхона тоғига шу каби нохуш ҳодисаларнинг олдини олиш мақсадида металл буюмларни аниқловчи детектор ўрнатган эди.
Маҳмуд Аббоснинг айтишича, у Иордания, Миср, Саудия Арабистони ва Марокаш давлатларининг раҳбарлари билан гаплашиб, улардан Исроил ўзининг Ибодатхона тоғидаги ҳаракатларини тўхтатишини талаб қилишини сўраган.
Шунингдек, Фаластин раҳбари Исроилни қўлга олинган барча фаластинлик асирларни қўйиб юборишга чақирди ва сўнгги зўравонликлар оқибатида барча жабрланганларни даволаш бўйича қонун лойиҳасини ишлаб чиқишини таъкидлаб ўтди.
Изоҳ (0)