Александр Лобановнинг қўпол хатоси сабаб Ўзбекистон термаси «Зоб Оҳан»га ҳам мағлуб бўлди

Самвел Бабаян бош мураббийлигида Туркияга жўнаб кетган футбол бўйича Ўзбекистон миллий терма жамоаси Эроннинг «Зоб Оҳан» клубига қарши ўртоқлик ўйинида майдонга тушди ва 0:1 ҳисобида имкониятни бой берди.

«Championat.asia» нашрининг маълум қилишича, Ўзбекистон миллий терма жамоаси дарвозасини биринчи бўлимда Игнатий Нестеров қўриқлаган ва томонлар танаффусга 0:0 ҳисобидаги дуранг билан чиқиб кетган.

Бош мураббий иккинчи бўлимда ўзи асосий деб биладиган дарвозабон Александр Лобановни майдонга туширган. Айнан унинг қўпол хатосидан сўнг эронлик футболчилар гол уришга муваффақ бўлган. Бу гол ўйин якунига қадар ягоналигини сақлаб қолган.

Ўзбекистон миллий терма жамоаси Самвел Бабаян бошқарувида Эрон термасига қарши икки ўйин ўтказиб, ҳар иккисида ҳам имкониятни бой берган ва рақиб дарвозасига битта ҳам аниқ зарба бера олмаганди. Энди бош жамоа Эрон миллий чемпионатини 4-ўринда якунлаган клубга ҳам имкониятни бой бериб қўйди.

Учрашув тафсилотлари ҳақида «Зоб Оҳан» клубининг Instagram саҳифаси маълумот берган. «Championat.asia» эса Лобанов ўтказиб юборган голни ўзининг Instagram саҳифасига жойлаштирди.

Ўзбекистон - Зоб Оҳан 0:1. ?Лобановнинг қўпол хатоси ва гол!? @zobahan_official

Публикация от championat.asia (@championat.asia) Июл 19 2017 в 12:17 ПДТ