Бразилиялик шифокорлар шарофати билан тўққиз ҳафталик ҳомиладор бўлган вақтида вафот этган аёл тўрт ойдан сўнг эгизак фарзандларини дунёга келтирди, деб ёзади «Mk.ru». Бундай туғуруқ тарихдаги биринчиси эмас, аммо миянинг ўлимидан сўнг мутахассислар аёлнинг ҳомиласини сақлаб турган муддат рекорд кўрсаткич ҳисобланади.
Бразилиялик Франкилен да Сильва Замполи Падилья 21 ёшида инсульт ва мияга қон қуйилишидан вафот этди. Дастлаб мутахассислар унинг қорнидаги ҳомилалар ҳам вафот этганини тахмин қилди, аммо ультратовушли текширув уларнинг тириклигини кўрсатди.
Бразилиялик шифокор илгари онаси вафот этганига қарамай, ҳомилани 107 кундан сўнг туғдиришга муваффақ бўлган португалиялик ҳамкасби билан маслаҳатлашди. Мутахассислар болаларнинг органлари аёлнинг қорнида ўсишда ва ривожланишда давом этишига эришди.
Аёл касалхонага келиб тушганидан сўнг 123 кун ўтгач, шифокорлар кесарча кесиш йўли билан 1,4 килограммлик қиз ва 1,3 килограммлик ўғил чақалоқни туғдириб олди. Мутахассислар таъкидлашича, уларнинг саломатлиги худди шундай ёшдаги чала туғилган «оддий» чақалоқларники каби бўлган. Улар касалхонанинг махсус бўлимида яна уч ойни ўтказди, энди эса уларга бувиси ғамхўрлик қилмоқда.
Изоҳ (0)