Японияда 13 июль, пайшанба тонгида икки нафар жиноятчи қатл қилинди. NHK телеканалининг адлия вазирлигига асосланиб маълум қилишича, 61 ёшли Масакадзу Нисикава ва 34 ёшли Коити Сумида қатл қилинган, деб хабар берди «Корреспондент.net».
Масакадзу 26 йил олдин ўғрилик мақсадида овқатланиш маскани хўжайинлари бўлган тўрт нафар аёлни ўлдирган. У 2005 йилда ўлим жазосига ҳукм қилинган. Коити эса ўзининг собиқ ҳамкасбини ўлдирган ва бўлакларга бўлиб ташлаган. У 2013 йилда ўлим жазосига ҳукм қилинган.
Японияда бундан олдинги ўлим ҳукми ўтган йилнинг ноябрида амалга оширилган. Синдзо Абэ 2012 йил декабрида бош вазир этиб тайинланганидан бери 19 киши қатл қилинган.
Ҳозирда яна 130 киши ўзининг ўлимни кутмоқда. Японияда қатл жараёни дорга осиш орқали амалга оширилади.
Халқаро инсон ҳуқуқлари ташкилотлари Японияни жазонинг ушбу турини бекор қилишга чақирмоқда. Судланган ўзининг қатл вақтини йиллаб кутиши мумкин, бироқ у ҳукм ижро этиладиган куннинг тонггида бундан хабар топади.
Изоҳ (0)