Хитойлик олимлар дунёда биринчи бўлиб Ердаги объектни орбитага телепортация қилди

Хитойлик олимлар орбитадаги сунъий йўлдошга Ердан фотонни телепортация қилди, деб ёзади Afisha Daily.

QUESS («Мо-Цзи») квант алоқа сунъий йўлдоши миссияси жамоаси Ердан орбитага жами 911 та фотонни юбора олди. Заррача босиб ўтган масофа 500 дан 1400 километргача оралиқда бўлган. Шу тариқа хитойлик олимлар квант телепортацияси учун рекорд ўрнатди. Бунгача масофа бир неча ўн километр билан чекланган эди.

Олимлар таъкидлашича, уларнинг ишида телепортациянинг аниқлик даражаси 80 фоизга етади, йўқотишлар эса 41 дан 52 децибеллгача бўлиши мумкин (100 мингтадан битта фотон учиб боради). Ўз тажрибаси учун улар Тибетда тўрт минг метр баландликда станция қурди.