Кеча — 30 июнь куни Қаршининг «Насаф» клуби реконструкциядан чиқарилган стадионига қайтди ва Ўзбекистон кубоги доирасида «Қўқон-1912» устидан 4:1 ҳисобида зафар қучди.
Таъмирлаш ишлари давом этаётган бир пайтда «Насаф» Ғузордаги стадионда уй учрашувларини ўтказиб келаётганди. Эндиликда жамоанинг уй стадиони аввалгидек 16 минг эмас, балки 22 минг мухлисни ўз бағрига сиғдира олади. Бунда югуриш йўлакларининг олиб ташлангани, мухлислар ва футболчилар ўртасидаги масофанинг қисқаришига туртки бўлган.
2016 йилнинг 30 июнь санасида Ўзбекистоннинг Биринчи Президенти Ислом Каримов жойларда ижтимоий-иқтисодий ислоҳотларнинг бориши, амалга оширилаётган бунёдкорлик ва ободонлаштириш ишлари билан яқиндан танишиш мақсадида Қашқадарё вилоятига ташриф буюрган эди, деб ёзилди «Championat.asia» сайтида. Ташриф доирасида Қарши шаҳридаги «Марказий» стадионга борган давлат раҳбари уни реконструкция қилиш, спортчилар ва томошабинлар учун қулайликларни янада ошириш, хавфсизлик чораларини кучайтириш бўйича зарур тавсиялар берганди. Орадан роппа-роса бир йил ўтиб, 2017 йилнинг 30 июнь санасида «Марказий» стадион янги қиёфада мухлисларни ўз бағрига чорлади.
Изоҳ (0)