Ким рози-ю, ким қарши? Фуқаролар 11 йиллик таълим бўйича ўз муносабатини билдирмоқда

Шавкат Мирзиёев 16 июнда Тошкент шаҳрининг Учтепа туманидаги 78-умумтаълим мактабини бориб кўриш жараёнида мактаб билан коллежлар ўртасидаги боғлиқликни мустаҳкамлаш, хусусан, ушбу мактабда тажриба сифатида 11 йиллик таълимни қайта тиклаш, унинг қошида ўқув-касб корхонаси ташкил этиш зарурлигини таъкидлаган эди.

18 июнда Тошкентдаги ўрта умумтаълим мактабларида 2017 йилда 9-синфни битирган ўқувчиларнинг ота-оналари ўртасида сўров ташкил қилинди.

Ўзбекистон Халқ таълими вазирлиги томонидан кенг жамоатчиликнинг 9-синфдан кейинги таълим борасида фикрини ўрганиш мақсадида 20 июнда Ўзбекистон бўйлаб барча умумтаълим мактабларида битирувчилар ва уларнинг ота-оналари иштирокида сўров ўтказилиши ҳақида хабар берилди.

Фуқаролар эса бу масалада ўз фикрларини билдирмоқда.

Хуршид Ҳошимов

Агар бу беш йил аввал бўлганида эди, тўлиқ қўшилган бўлардим. Бироқ, ҳозир кўплаб ўқитувчилар коллежларга ўтиб кетди, шунинг учун таълим сифатида катта фарқ бўлади, деб ўйламайман. Лекин тарбия жиҳатидан бу фойдага хизмат қилиши аниқ.

Улуғбек Ҳайдаров

Коллежда ўқиётган қизларни турмушга бериш ҳолатлари жуда кўп бўлди. Шунинг учун ўрта таълимни 11 йиллик қилиш ҳақидаги қарор бу жараённи ўз-ўзидан тўхтатади. Аввал мактабда ўқийдиган қизлар турмушга берилмаган.

Музаффар Рустамов

Бирор бир қонуннинг қабул қилиниши халқнинг фикри олинганидан сўнг амалга оширилиши тарафдориман. 11 йиллик таълим «ҳа» ва «йўқ»ларсиз, асосланмасдан бекор қилинган, бу ҳали севимли мамлакатимиз ривожига салбий таъсир кўрсатади. Эртага биз мактабга сўровга борамиз. Бироқ бу жараён коллеж ва лицейларни аниқлаш ва ҳужжат топшириш вақтида шошилинч тарзда амалга оширилаётгани яхши бўлмаяпти.

Баҳодир Абдуллаев

Ўрта-махсус таълимга нима бўлади? Ўрта-махсус таълим олган мутахассислар ҳам керак-ку. Меҳнат қонунчилигига ўзгартириш киритиб, бундай мутахассисларни тайёрлайдиган муассасалар томонидан бериладиган ҳужжатларни белгилаш керак. Шунда бу муассасаларнинг нуфузи ошган бўларди.

Рустам Носиров

Жуда тўғри қарор, амалиёт коллеж битирувчилари умуман ҳеч нарсага ярамаслигини кўрсатди. Тахминан битирувчиларнинг 80 фоизи ишсиз юрибди ва меҳнат бозорида уларга талаб ҳам йўқ.

Тўлқин Умаров

Ўйлашимча, 11 йиллик таълимни ҳамма учун бирданига жорий қилиш нотўғри. Олий таълим муассасларида ўқишни хоҳловчилар учун бу яхши, бироқ бошқалар учун йўқ. Бу қисм эса мактаб ўқувчиларнинг кўпчилигини ташкил қилади. Тўққиз синф етарлича, кейин эса танланган мутахассислик бўйича коллеж. Бундай тизим дунёда ҳам қабул қилинган.

Нина Тимонина

Нима учундир мамлакатда муҳим қарорлар тез қабул қилинадиган бўлиб қолди. Лицей ва коллежларга қанча пул сарфланди. Албатта, ота-онларга яхши: болалар синф раҳбарининг назорати остида бўлади. Болалар эса ўқишни хоҳламайди. Уларга мактабда кўришиш, гаплашиш ёқади. Китоб ўқишни хоҳламайди. Кейин эса дарс қолдириш бошланади, синф раҳбари учун яна бош оғриғи. Лицей ва коллежда эса болалар тез улғаяди.

Александр Ким

11 йиллик таълим — бу яхши. Аввалги ва ҳозирги таълим даражасига эътибор беринг. Албатта, ўқитувчилар етишмаслиги, мактаб дастурларини яратиш ва бошқа ташкилий масалалар бўйича муаммолар бўлади, бироқ бунинг ҳаммаси ўз вақти билан изга тушади. Қатъий қарор қилганлар учун ихтисослаштирилган коллеж ва лицейларни ОТМлар ҳузурида қолдириш мумкин. Бундан ташқари, коллеж ва лицейларга киришдаги коррупцион ишлар, битирувчи ўқишни тугатгач ишга қабул қилиниши ҳақида бериладиган маълумотнома, маълумотнома бўлмаса, коллеж раҳбарияти диплом бермаслиги ҳақидаги мавҳум талаблар йўқолади. Шунинг учун мен Президентимиз ташаббусини тўлиқ қўллаб-қувватлайман.

Жаннат Ҳабибуллина

Бу масала бўйича фикрлар аллақачон муҳокама қилинган, одамларнинг асосий қисми бунга рози. Балки тажрибанинг ҳам кераги йўқдир. Асосийси — мактабларни керакли педагоглар билан тўлдириш.

Олга Головченко

Болалар ва ота-оналарда танлов бўлиши керак: 11 йил мактабда ўқиш ёки 9-синфдан кейин касб танлаш. Ҳозирги пайтда лицей ва коллежларда яхши тизим ва моддий база бор. Кўплаб мактабларда эса турли фанлар бўйича вакант ўринлар бор.

Ми-Лена МилаСтудй

Ўйлашимча, коллежларни сақлаб қолиш керак. Ҳар йили олий таълимга ўқишга кирувчилар сони қатъий белгиланади. Болангиз 11-синфни тугатди ва институтга кира олмади, кейинчи? У камида бир йилни йўқотади. У мутахассисликсиз ўзига маъқул ишни топа олмайди. Шунинг учун коллежлардаги таълим тузилмасини ўзгартириш яхшироқ бўларди, деб ўйлайман.