2017 йил 16 июнда Сурхондарё вилояти Шўрчи тумани ҳокими Хайбулла Маматқулов эгаллаб турган лавозимидан озод этилди. Бунга Хайбулла Маматқулов Ўзбекистон Президенти томонидан эълон қилинган «Халқ билан мулоқот ва инсон манфаатлари йили»дан кўзланган мақсад ва вазифаларнинг туб моҳиятини етарлича тушуниб етмасдан, туман аҳолиси билан тизимли равишда самарали алоқа ўрнатмагани, фуқароларнинг мурожаатларида кўтарилган масалаларга эътиборсизлик билан қараб келгани ҳамда бу борада ҳокимлик тизимида ишларни лозим даражада ташкил эта олмагани сабаб бўлган. Бу ҳақда Facebook’даги Халқ билан мулоқот саҳифаси маълум қилди.
Хабар қилинишича, собиқ ҳоким аҳолини қийнаётган муаммоларни чуқур ўрганиш ва таҳлил қилиш асосида уларни ҳал этиш юзасидан амалий чора-тадбирлар кўриш масаласида жиддий камчиликларга йўл қўйган. Бу борада унда талабчанлик етишмаслиги, сусткашлик қилиб келгани туфайли туман фаоллари ва аҳолиси орасида Хайбулла Маматқулов фаолиятига нисбатан эътирозлар ортиб борган.
Сурхондарё вилояти ҳокимлиги томонидан Хайбулла Маматқуловга юқорида кўрсатиб ўтилган жиддий камчиликлари учун бир неча бор интизомий чоралар кўрилган. Лекин у бундан тегишли хулоса чиқармаган ва ҳудуд аҳолиси муаммоларини ҳал этиш юзасидан зарур амалий чоралар кўрмаган.
Хайбулла Маматқулов Шўрчи тумани ҳокими сифатида 2012 йил 6 февралдан ишлаб келаётган эди.
Изоҳ (0)