Шу йил бошида россиялик таниқли қўшиқчи Нюша янги «Тебя любить» қўшиғига клип олаётгани ва тез орада уни премьера қилишини эълон қилган эди, ҳаттоки ОАВларда суратга олиш жараёнлари акс этган суратлар пайдо бўлган эди. Хонанданинг ўзи эса клип режиссёри — ўзбекистонлик Баҳодир Йўлдошевга қаратилган мақтов сўзларини изҳор этган эди, деб ёзади «24post.uz».
Аммо Нюша ваъда қилган премьера ўз вақтида амалга ошмади: кенг реклама қилинган клип томошабинлар эътиборига ҳавола этилмади. Қўшиқчининг расмий сайтида бунга режиссёрнинг «нопрофессионаллиги ва ноҳаллоллиги» сабаб қилиб келтирилди. «У ўзи учун яратилган барча шароитларга қарамай, чиройли ва сифатли клип ишлаб бера олмади — клип аввалдан келишилган концепцияга мувофиқ тушмади», — дейилади унда.
Нашр таъкидлашича, ўзбекистонлик режиссёр Нюшанинг кўплаб клипларини суратга олган, улар анчагина машҳурликка эришган. Бундан ташқари, Баҳодир Йўлдошев Леонид Агутин, МакSим, Согдиана, «А-студио» ва бошқа россиялик юлдузларнинг кўплаб клиплари муаллифи ҳамдир.
Нашр эслатишича, бир неча йил аввал Нюшанинг режиссёр ижодига мансуб «Не перебивай меня» қўшиғи клипини ҳатто туркиялик хонанда ўз қўшиғи учун кўчириб олган. Ўшанда Нюшанинг отаси Баҳодир Йўлдошевни туркиялик қўшиқчининг клипини кўчириб олишда асоссиз айблаган, аммо судда ўзбекистонлик режиссёр аслида туркиялик ҳамкасби кўчирмачи эканлигини исботлаб беришга муваффақ бўлган.
«‘Тебя любить’ клипи борасида у ҳақиқатан ҳам бизга панд берди. Деярли бутун клип павильонда яшил фонда суратга олинди… Баҳодир унинг ўрнига компьютер графикасини жойлаштириши керак эди, бунга жуда кўп пул сарфланди, аммо графика мутлақо сифатсиз бўлиб чиқди. Уни қайта бажариш жуда кўп вақт ва пул талаб қиларди. Шунинг учун биз бу клипдан воз кечиб, бошқасини суратга олишга қарор қилдик», — деди Нюшанинг PR-менежери Денис Воробьёв.
Изоҳ (0)