«Тошкент-Аэро» ихтисослаштирилган божхона комплекси томонидан пойтахтдаги «Шофайзи», «Ватан», «Тракторсозлар», «Шоштепа», «Афросиёб», «Нўғой-қўрғон» каби маҳаллаларда ҳуқуқбузарликлар профилактикасини амалга оширишга қаратилган қатор учрашувлар ташкил этилди. Мазкур тадбирларда маҳалла фаоллари, профилактика инспекторлари ва кенг жамоатчилик вакиллари иштирок этди. Бу ҳақда комплекс ахборот хизмати маълум қилди.
«Шофайзи» маҳалласидаги йиғилишда сўзга чиқар экан, «Тошкент-Аэро» ихтисослаштирилган божхона комплекси божхона текширувлари ва суриштирув бўлими бошлиғи А.Жалилов ҳуқуқбузарликлар профилактикаси ва жиноятчиликка қарши курашиш борасида амалга оширилаётган комплекс чора-тадбирлар мамлакатда ҳуқуқ-тартиботни таъминлашда ижобий натижаларга эришиш, криминоген вазиятни янада яхшилашга хизмат қилаётганини таъкидлади.
«Шофайзи» маҳалласида ҳам божхона қоидабузарликларини содир этиб, жавобгарликка тортилган шахслар учраб турибди. Улардан бири 32 ёшли Умиджон Шарифов (исми-шарифлар ўзгартирилган) бўлиб, ушбу шахс Москвадан учиб келар экан, Ислом Каримов номидаги Тошкент халқаро аэропортида божхоначилар томонидан тўхтатиб қолинди. Унга тегишли қўл телефони ўрнатилган тартибда кўздан кечирилганда, телефон хотирасида 26 дона беҳаё мазмундаги видеолавҳа борлиги аниқланди.
Умиджон Шарифовга нисбатан Маъмурий жавобгарлик тўғрисидаги Кодексининг 189-моддаси билан маъмурий иш юритилиб, суд хукмига биноан ушбу шахс айбли деб топилди ҳамда энг кам ойлик иш ҳақининг 10 баробари миқдорида, яъни 1 497 750 сўм жарима жазоси тайинланди.
«Афросиёб» маҳалласида бўлиб ўтган учрашувда эса товар-моддий бойликларни божхона чегаралари орқали ноқонуний олиб ўтилишига чек қўйиш борасида амалга оширилаётган чора-тадбирлар ва бу борадаги мавжуд тартиблар ҳақида ахборот берилди.
Мазкур маҳаллада маҳаллада истиқомат қилувчи Х.Аҳадова Бокуга парвози олдидан Ислом Каримов номидаги Тошкент халқаро аэропортида шахсий кўрикдан ўтказилганда божхоначилар ва холислар қаршисида уялиб қолди. У ички аъзоларига яширганча қиймати 14,5 миллион сўмлик 60 граммдан ортиқ заргарлик буюмларини яширинча олиб чиқишни режалаштирган экан.
Х. Аҳадовага суд хукмига биноан энг кам ойлик иш ҳақининг 2 баробари миқдорида, яъни 299 550 сўм жарима жазоси тайинланди. Тилла тақинчоқлар эса белгиланган тартибда давлат эгалигига ўтказилди.
Изоҳ (0)