Ойбек Қиличев «Навбаҳор» футбол клубининг апрель ойидаги энг яхши футболчиси деб топилди. Бу ҳақда Наманган жамоаси матбуот хизматига асосланиб, «Championat.asia» нашри маълумот берди.
Клуб мухлислари орасида ўтказилган сўровномада Қиличев 35 фоиз овоз тўплаган. Иккинчи ўрин эса 25 фоиз овозни ўзиники қилиб олган ҳужумчи Неманя Йовановичга тегишли.
Апрель ойидаги энг яхши футболчи нима сабабдан июнь ойига келибгина эълон қилингани маълум эмас.
Ойбек Қиличев май ойининг сўнгги ўн кунлигида ўтган «Бухоро»га қарши учрашувда ўзидан ёшроқ бўлган Эргаш Исмоиловни ургани учун майдондан четлатилган ва икки учрашувга дисквалификация қилинганди. Жазо ўталиши керак бўлган биринчи ўйин келмасиданоқ Қиличев оила қурди.
Бокс мураббийи Тўлқин Қиличевнинг укаси бўлган Ойбек Қиличев, Рио—2016 Олимпиадаси иштирокчиси, Uzbek Tigers клуби аъзоси Баҳодир Жалоловнинг синглисига уйланган.
Изоҳ (0)