Тошкентдаги Боровский номидаги коллежнинг 2-курсида таълим олувчи Жасурбек Иброҳимов 1 июнь куни касалхонада вафот этди. У 3 май куни коллеждошлари томонидан қаттиқ калтакланган, шундан сўнг касалхонага тушган эди. Шифокорлар жабрланувчини беш марта операция қилган, бироқ унинг ҳаётини сақлаб қола олмаган. Марҳумнинг онаси айбдорларни жазолашни сўраб, Ўзбекистон Президентига мурожаат қилди. Ҳодиса тафсилотлари ҳозирча фақат онанинг сўзларидан маълум.
Жасурбек Иброҳимов 17 ёшда эди. Ижтимоий тармоқларда унинг онаси номидан эълон қилинган мурожаатда таъкидланишича, Жасурбек 1999 йил 11 декабрь куни туғилган, Боровский коллежининг 2-курсида таълим оларди. «У тўлиқ ижобий бола, яхши ўқийди, ичмайди, чекмайди, спорт билан фаол шуғулланади», — деб ёзади она. Маълумотларга кўра, оиладаги аҳвол, ота-она ва боланинг ўзаро муносабатлари яхши бўлган. «Мен ва турмуш ўртоғим олий маълумотли ва барча фарзандларимиз соғлом оилада, меҳр ва муҳаббат оғушида вояга етмоқда», — деб ёзган эди Жасурбекнинг онаси 29 май куни ижтимоий тармоқларда эълон қилинган мурожаатида. Мурожаатда оиладаги фарзандлари сонига аниқлик киритилмаган.
Мавзуга доир: Коллеждошлари томонидан аёвсиз дўппосланган марҳум Жасурбек Иброҳимовнинг онаси мурожаати
Онанинг таъкидлашича, Жасурбекни 2- ва 3-курсларда таълим оладиган камида олти ўқувчи дўппослаган, улардан икки нафари безорилар рўйхатида ҳам туради. «Муштлашув тафсилотини айтиб берганлар Ўлмас орқадан келиб куч билан ўғлимни тепганини, сўнг ўғлим йиқилгани, қолганлар эса уни ҳар томондан тепкилашни бошлагани, охирида эса Ўлмас ерда ётган жабрланувчининг аҳволини суратга туширганини айтиб берди», — дейди марҳумнинг онаси. Жасурбек касалхонага ётқизилиб, дастлабки кўриклардан сўнг ҳушига келганидан сўнг, онасига «биринчи зарбадан сўнг йиқилгани, сўнг туришга уринган вақтида, тиззалаб тургани ҳолда турли томонидан тепкилангани, кейин ҳушидан кетгани»ни айтиб берган.
Калтакланганидан сўнг, Жасурбек Иброҳимов бир ой ичида беш марта операция қилинган. Йигит биринчи марта УТТдан ўтказилганида шифокорлар унга «буйрак ва ошқозоности бези ишдан чиқиши» ташхисини қўйган, мияси чайқалгани ва бурун қисмида синиш борлигини айтган. 5 май куни Жасурбек биринчи марта операция қилинган, операциядан сўнг шифокор Жасурда «ўн икки бармоқли ичак зарарлангани, буйрагини тўла гематома қоплаб олгани, ошқозоности бези жиддий лат егани ва бошқа органлари ҳам жароҳатлангани, йиринглаш бошлангани сабаб қорин бўшлиғи тўқимасининг бир қисми олиб ташлангани»ни билдирган.
Йигит шундан сўнг 8 май, 19 май (шу куни унинг ўт пуфаги олиб ташланган), 20 май ва 28 май кунлари операция қилинган. Хабарларга кўра, йигитнинг «организми сўнгги операцияни кўтара олмаган».
Ўқувчилар ўз коллеждошини айнан қандай баҳона билан дўппослагани номаълум. Боровскийда аввалроқ ҳам шунга ўхшаш воқеа юз берган. Жасурбек Иброҳимовни дўппослаганликда гумон қилинаётган ўқувчилар 2-курсда ўқийдиган Темур исмли йигитни калтаклаб, унга жароҳат етказган (йигитнинг юзига бир неча чок тушган), сўнг ишни «тинчитиш учун жабрланувчига 200 доллардан пул берилган». «Коллеж ўқувчиларининг айтишича, Ислом ва Ўлмас нисбатан кучсиз ўқувчиларни уради, буни суратга туширади, сўнг уларнинг ота-оналари жабрланувчиларга пул тўлаб, ишни тинчитади, бу ўсмирлар эса уриб, жабрланувчини суратга туширишдан ва, албатта, жазога тортилмаслигидан завқ олади», — деб ёзади марҳум Жасурбекнинг онаси.
Марҳумнинг оила аъзолари 3 майдан бери Бош прокуратура, ИИВ ва ҳатто Омбудсманга ҳам мурожаат йўллаган. Охир-оқибат, Жасурбекнинг онаси 3 июнь куни интернет орқали Ўзбекистон Президентига мурожаат қилишга мажбур бўлган. «Бевосита сизга ариза билан мурожаат қилиш имконияти борлиги учун миннатдорчилик билдириб, бошқа органларга, айнан — Бош прокуратура, ИИВ, Таълим вазирлиги, Соғлиқни сақлаш вазирлиги, шунингдек, Омбудсманга мурожаат қилиб, ҳеч қандай натижага эришмаганимизни маълум қилмоқчиман... Ўғлим вафот этди! Ушбу ваҳшиёна таҳқирлаш учун эса ҳеч ким жазоланмаяпти ва бизни ҳамма инкор этмоқда!.. Бизнинг ҳолатимизни ҳис қилиб кўринг — ардоқли ўғилсиз қолиш дарди тасвирлаб бўлмас даражада оғир, энди қандоқ яшайлик?».
Онанинг таъкидлашича, гумонланувчилардан бирининг ота-онаси ҳуқуқшунос ва «улар ҳаммани сотиб олиб бўлган», шу сабабли ҳам тегишли органлар ишни пайсалга солмоқда, коллеж ўқитувчилари ҳам ишга панжа ортидан қарамоқда (масалан, она гумондаги ўқувчиларнинг фамилияларини сўраганида, ўқитувчилар бу болаларнинг фамилиясини билмаслигини айтган; ҳодиса юз берган вақтда ўқувчилар қаерда бўлгани ҳақида турлича ахборот берган).
Ҳодиса ижтимоий тармоқларни ларзага келтирди. Жасурбек Иброҳимовнинг онаси томонидан ёзилган мурожаат Facebook’нинг қарийб барча катта пабликларида эълон қилинди. Биргина ТРОЛЛ УЗ саҳифасида эълон қилинган мурожаат матнига тўрт соат ичида 5,5 мингдан ортиқ муносабат билдирилди, у 7 мингдан зиёд марта улашилди, 2,5 мингга яқин изоҳ ёзиб қолдирилди. Айнан ижтимоий тармоқлардаги фаоллик сабаб ОАВ мазкур воқеага эътибор қаратди.
Интернет фойдаланувчилари марҳумнинг оила аъзоларига сабр тилаган, расмийлардан эса ҳодисага эътибор қаратиб, айбдорларни жазолашни қатъий талаб қилган. «Change.org» сервисида Жасурбекнинг ўлими айбдорларини жазолаш талаби билан петиция очилган (мақола ёзилаётган вақтда уни 2,5 мингда зиёд фойдаланувчи имзолаб, қўллаб-қувватлаган эди). Шу билан бирга, ижтимоий тармоқ фойдаланувчилари Жасурбекнинг онаси томонидан Президентга йўлланган мурожаат остида имзо тўплаш учун 5 июнь куни соат 12:00 да «Бобур» боғида тўпланмоқчи.
Боровский коллежи ҳамширалик иши, даволаш иши, акушерлик иши йўналишларида ўрта махсус тиббий мутахассислар тайёрлайди. Ўқув юртига 1935 йилда асос солинган, 1976 йили унга медик-олим Пётр Фокич Боровский номи берилган, 2004 йили эса коллеж мақомини олган. Коллежда, унинг сайтида келтирилган маълумотларга кўра, 3 мингдан зиёд ўқувчи таълим олади. Ўқув муассасасига 2008 йил ноябридан бери Лутфи Юсупова раҳбарлик қилади.
Коллежнинг ўқувчиларининг Одоб-ахлоқ қоидалари бор ва унга кўра «Ўқувчиларнинг ўзаро муносабатларида... ҳурмат,.. дўстлик,.. ва адолат тамойиллари амал қилиши лозим; Ўқувчилар муносабатларида инсон қадр-қимматига ҳурматсизлик қилиш, шахсиятини камситиш, қўполлик, муштлашиш,... жисмоний зиён етказиш қатъиян ман этилади». Бу қоидаларни бузганлик учун белгиланган жазолар ҳақида маълумот берилмаган.
Изоҳ (0)