Латвияда «Ўзбекистон—Латвия савдо-иқтисодий ва сармоявий ҳамкорлиги. Тадбиркорлик фаолиятида янги имкониятлар» мавзусида семинар бўлиб ўтди, деб хабар берди UzDaily.
Семинар Ўзбекистон Республикаси Олий Мажлиси Сенати раиси Ниғматилла Йўлдошев бошчилигидаги парламент делегациясининг Латвия Республикасига 2017 йилнинг 15—18 май кунлари амалга оширилган ташрифи доирасида бўлиб ўтди.
Ўзбекистон Савдо-саноат палатаси матбуот хизматининг хабар беришича, семинар ишида Ўзбекистон ва Латвия давлат тузилмалари ҳамда ишбилармон доиралари вакиллари иштирок этган.
Сенати раиси Ниғматилла Йўлдошевнинг таъкидлашича, Латвия Ўзбекистоннинг ишончли ҳамда вақт синовидан ўтган сиёсий ва иқтисодий ҳамкори ҳисобланади.
Ҳозирда Ўзбекистонда Латвия инвесторлари иштирокида 47 та корхона, жумладан, 13 таси Латвия томонидан 100 фоиз молиялаштирилган. 15 та Латвия компания ваколатхонаси аккредитация қилинган.
Ўзбекистон делегацияси латвиялик тадбиркорларга Ўзбекистонда озиқ-овқат ва енгил саноат, шунингдек, муқобил энергетика соҳасида қўшма сармоявий лойиҳаларни амалга оширишда иштирок этиш таклифини берди.
Ўзбекистон корхоналари Латвияга турли маҳсулотларни етказиб беришга тайёрлиги алоҳида қайд этилди. Шунингдек, семинар қатнашчилари транспорт ва логистика соҳасидаги ҳамкорлик масалаларини ҳам муҳокама қилди.
Семинар доирасида текстил ва озиқ-овқат саноатида ишловчи қатор ўзбек компаниялари маҳсулоти экспозицияси ташкил этилди.
Шу билан бирга, Ўзбекистон кичик бизнес субъектлари ва хусусий тадбиркорликни қўллаб-қувватлаш Фонди ҳамда Латвия стивидорлар Ассоциацияси ўртасида, «Ўзагроэкспорт» Акциядорлик жамияти ва А Fruits (Латвия) компанияси Рига шаҳрида Савдо уйини ташкил этиш тўғрисида, «Ўзбекозиқовқатзахира» Ассоциацияси ва BIOR Илмий-тадқиқот лабораторияси вакиллари ўртасида лаборатория тадқиқотлари соҳасида ўзаро англашув ва ҳамкорлик тўғрисида меморандумлар имзоланди.
Тадбир якунида Ўзбекистон Савдо-саноат палатаси ва Латвиянинг сармоялар ҳамда тараққиёт Агентлиги ўртасида ҳамкорлик ҳақида битим имзоланди.
Изоҳ (0)