Ўзбекистоннинг ташриф буюриш керак бўлган 10 та ажойиб нуқтаси (фотогалерея)

«Kommersant.uz» Ўзбекистон ҳақидаги шарҳлар ва йўлкўрсаткич китобларда тилга олинмайдиган археологик, табиий ва меъморий ёдгорликларни келтириб ўтди.

Хўжа Гургур ота массиви

Сурхондарё вилоятидаги Бойсунтов тизмасида жойлашган, 3720 метр баландликка эга массив ёввойи табиат ошёни ҳисобланади. Унга Бойсундан Олачопон, Қайроқ ва Диболо қишлоқлари орқали бориш мумкин, аммо бу йўл массивнинг қия нишабига элтади, у орқали чўққига кўтарилиш учун эса инсондан катта маҳорат ва куч-бардош талаб этилади. Иккинчи йўл Дарбант дарасидан ўтиб, Мачай, Қизил Новур ва Кентала қишлоқларидан чиқади.

Майданак баланд тоғ обсерваторияси

1970 йилда Шаҳрисабздан 45 км жануброқда, Майданак платосининг ғарбий қисмида қурилган. Обсерватория Шимолий ярим шардаги энг яхшиларидан бири: бу ерда тўртта комета, 80 дан ортиқ астероид, янги «Самарқанд» кичик сайёраси кашф қилинган.

Мўйноқдаги кемалар қабристони

Мўйноққа Нукус орқали борилади. Икки шаҳар ўртасидаги йўл тахминан 220 км. Нукусдан Мўйноққа ҳар куни эрталаб автобус қатнайди.

И.В. Савицкий номидаги Давлат санъат музейи

Рус авангарди коллекцияси бўйича дунёдаги иккинчи энг йирик музей Нукусда жойлашган. 1966 йилда рассом ва санъатшунос Игорь Савицкий шаҳар ҳукуматини музей яратиш зарурлигига ишонтира олди. Ажратиб берилган бинони ўз маблағлари ҳисобидан таъмирлади ва турли жанрдаги асарларни сотиб олиб, коллекция яратишга киришди. Ҳозирда коллекция 90 мингта турли экспонатлардан иборат, улар орасида Луврдаги экспонатларнинг айнан нусхалари бор.

Дербент дараси

Дербент ёки Дарбанд дараси Сурхондарё вилояти Бойсун тумани атрофларида жойлашган. Дарага киришда Зиндонак ғори бўлиб, у ерда маҳбуслар сақланган. Ундан тор йўл орқали Хўжамой ота зиёратгоҳига ўтилади.

Шаҳрисабздаги Оқсарой

Оқсарой Амир Темурнинг она шаҳри Шаҳрисабздаги қароргоҳи бўлиб, 24 йил давомида қурилган. Сарой бир нечта ҳовлилардан иборат бўлиб, улар атрофида хоналар жойлашган. Оқсароқнинг кириш пештоқидаги арка Ўрта Осёдаги энг йириги бўлган, у 300 йил аввал қулаб тушган. Айни пайтгача саройдан фақат иккита тарқоқ минора қолган, холос.

Арашан кўллари

Тошкент вилояти Қирғизистон ва Наманган вилояти билан туташган жойда 3000 метрдан юқорироқ баландликда Арашан кўллари жойлашган. Арашан радон конларидан сал тепароқда сўфийлар зиёратгоҳи жойлашган. Ривоятларга кўра, улкан тош ва тоғ эчкиси шохлари билан безатилган қабр — муқаддас Арашан бувининг қабри.

Термиздаги будда ибодатхоналари

Эски Термиз қадимий шаҳридан шимоли-ғарбда 1963 йилда буддийлик ибодатхоналари мажмуаси топилган. Мажмуа майдони 1,5 квадрат километрни ташкил этиб, ибодатхоналар ва хўжалик иншоотларидан иборат, улар эрамиздан аввалги III—I асрларга тегишли.

Урунғоч нефрит кўли

Уғом-Чотқол миллий боғида, 1227 метр баландликда жойлашган ноёб табиий сув ҳавзаси. Ундаги сув нефрит тусида жилоланади. «Урунғоч» уйғур тилидан «ёрқин нефрит» деб таржима қилинади.

Ҳазрати Довуд ғори

Самарқанддан 40 км жануби-ғарбда, Оқсой қишлоғи ҳудудида жойлашган ғорга етиб бориш учун 1303 та зинадан чиқиш ва яна 200 та зинадан тушиш керак. Бу ерда Довуднинг қўл ва оёқ кафтлари изини кўриш мумкин, уларга қўл теккизиш, ривоятларга кўра, ниятлар ушалишига олиб келади.