Ўзбекистонда уяли алоқа операторларига радиочастота полосалари қайта тақсимлаб берилди

Ўзбекистонда 900 / 1800 МГц радиочастота диапазонларида мобил алоқа тармоқларининг хизматлари Unitel МЧЖ (Beeline), Coscom МЧЖ (Ucell), «Ўзбектелеком» АКнинг UzMobile Миллий оператори (UzMobile) ҳамда Universal Mobile Systems МЧЖ (UMS) мобил алоқа операторлари томонидан кўрсатилмоқда. 900 / 1800 МГц радиочастоталари юқоридаги операторларга тўлиқ бўлиб берилган ва айни пайтда бўш полоса мавжуд эмас, деб ёзади Ахборот технологиялари ва коммуникацияларини ривожлантириш вазирлиги Ахборот хизмати.

Шунингдек, операторлар тенг бўлмаган миқдордаги радиочастота ҳажмига эга бўлган эдилар. Радиочастота полосалари мобил алоқа операторлари ўртасида узуқ-юлуқ ўлчамда, диапазоннинг турли қисмларида ажратилган эди.

Радиочастота полосаларининг бу тахлит тақсимланиши LTE (Long-Term Evolution) технологиясининг 4-авлод (4G) мобил алоқа стандартини жорий қилишга тўсқинлик қилади. Мазкур стандарт мобил алоқа тармоқларида ҳар қандай кўринишдаги (овозли, файл ва видео) маълумотларни юқори тезликда алмашиш учун жаҳон миқёсида жорий қилинмоқда. LTE стандарти эса юқори тезликда маълумот алмашишда кенглиги 10 дан 20 МГц гача бўлган яхлит частота полосаларини талаб этади.

Айрим мобил алоқа операторларида частота ҳажмининг кам миқдорда бўлиши мобил алоқа хизматларининг талаб даражасида сифатли кўрсатилмаслигига олиб келади.

Шу муносабат билан, Радиочастоталар бўйича Республика кенгаши томонидан мобил алоқа операторлари томонидан радиочастота ресурсларидан унумли фойдаланилишини таъминлаш мақсадида, «900 / 1800 МГц диапазонларида радиочастота полосаларини қайта тақсимлаш тўғрисида»ги қарори қабул қилинган эди.

Мазкур қарор операторларга радиочастота спектрларидан фойдаланиш бўйича тенг рақобат шароитини яратиб бериш, LTE технологиясини тезкор ривожлантириш учун уларнинг радиочастоталардан қулай ва самарали фойдаланишларини таъминлаш, мамлакатда мобил алоқа хизмати сифатини оширишга замин яратади.

Кенгашнинг мазкур қароридаги вазифаларни таъминлашда мобил алоқа абонентларида юзага келиши мумкин бўлган техник носозликларнинг олдини олиш мақсадида, мобил операторларга алоқа тармоқларини қайта мувофиқлаштириш бўйича чора-тадбирларни амалга оширишлари учун 6 ой вақт берилади.

900 / 1800 МГц радиочастота канал ва полосаларининг 900/1800 МГц диапазонларидаги амалдаги ва режалаштирилган тақсимоти тўғрисида маълумот