Тошкент шаҳар ички ишлар бош бошқармаси тўлақонли сайтини ишга туширди. Сайт икки тилда ишлайди, деб хабар беради «Газета.uz».
«Сайтда Тошкент шаҳар ИИББ томонидан ўтказиладиган тадбирлар акс этади, у ерга, шунингдек, қизиқтирган саволлар билан мурожаат қилиш мумкин», — маълум қилди 11 май куни ўтказилган брифинг чоғида идора бошлиғининг ўринбосари Дониёр Тошхўжаев.
Ҳозирги пайтда сайтда янгиликлар чоп этилган, бошқарма раҳбарияти ҳамда фуқароларни қабул қилиш графиги ҳақида ахборот мавжуд, мурожаат қилиш формаси ва унинг мақомини текшириш имконияти бор.
«Кўп бериладиган саволлар», «Қидирилаётган шахслар», «Дом-дараксиз йўқолганлар» бўлимлари тайёрланмоқда.
Сайт мобил ускуналар учун оптимизация қилинган. Улар орқали бевосита 102 (воқеалар ҳақида хабар бериш) ва 1102 (ходимларнинг ноқонуний хатти-ҳаракатлари устидан шикоят қилиш учун ИИВ ишонч телефони) рақамларига қўнғироқ қилиш мумкин.
Дониёр Тошхўжаев ички ишлар органлари фаолияти очиқлик ва ошкораликка асосланишини, ИИВ тизимида рўй бераётган ўзгаришлар эса аҳоли ишончини мустаҳкамлашга, шунингдек, ходимларнинг масъулиятини оширишга қаратилганини таъкидлаб ўтди.
Изоҳ (0)